Franca prezanton ilaçin e mundshëm për të mposhtur koronavirusin

Kompania farmaceutike franceze Sanofi njoftoi se është e gatshme t’u ofrojë autoriteteve të Francës ilaçin antimalarik në luftën kundër koronavirusit të ri që ka marrë mijëra jetë njerëzish në të gjithë botën.

Në një testim të fundit klinik, ilaçi Plaquenil u testua te 24 pacientë, dhe pas gjashtë ditësh, virusi ishte zhdukur në tre të katërtat e tyre.

Testimi u krye nga Drejtori i Institutit Universitar Mjekësor “Mediterranee Infection”, profesor Didier Raoult, institut kërkimi ky me qendër në Marsejë.

Sanofi tha se ata posedojnë disa milionë doza, të mjaftueshme për të trajtuar 300.000 njerëz të infektuar me COVID-19.

“Sanofi është e angazhuar për ta vënë në dispozicion trajtimin e tij në Francë”, tha zëdhënësi i kompanisë në një deklaratë për shtyp.

Instituti publikoi disa punime nëpër revistat mjekësore gjatë dy javëve të fundit në lidhje me efektivitetin e “Plaquenil”, një molekulë hidroksilklorine, e cila është përdorur dhe përdoret për dekada të tëra për të trajtuar sëmundje të ndryshme të shkaktuara nga infeksioni dhe artritin reumatoid.

“Kam shënuar rezultatet dhe kam dhënë autorizimin në mënyrë që të fillojë një testim më i madh nga ekipet e tjera sa më shpejt të jetë e mundur,” tha Ministri i Shëndetësisë, Olivier Veran, duke sqaruar se duhet të bëhen testime mbi një numër më të madh të pacientëve në mënyrë që të verifikohen rezultatet.