Français partout, justice nulle part!

nga Agim Popoci

Shqiptarët vetëm kur i zë belaja fillojnë dhe mendojnë se me çfarë bashkëpunëtori ose aleati kanë punë dhe cilin kanun ta përdorin. Pra, pas fatkeqësisë! Kështu ndodhi edhe me dialogun Kosovë-Serbi në Shtëpinë e Bardhë, dhe aktakuzën që doli nga hiqi se Presidenti i Kosovës, Hashim Thaçi është i akuzuar për krime lufte. Fillimisht u ngushëlluan se prokurori është amerikan, më pas doli se jo është francez e kryeprokurori është amerikan, dhe filluan të gërmojnë në historinë  e zhvillimngjarjeve deri te tallja dhe turpërimi që i bëri shqiptarëve BE ose më saktë Presidenti i Francës, Emmanuel Macron, për të degjeneruar Presidentin e SHBA, Donald Trump!

Gjithsesi në gjithë katrahurë që bënë francezët me Kosovën, fajet, padyshim, i kanë vetëm shqiptarët dhe askush tjetër! Pse?!

Çfarë do të thotë të jesh francez sot?! Lexo trilerin sociopolitik “Të egërit: Dasma”! Çfarë do të thotë të jesh francez në Kosovë, pyet një mitrovicali! Por, çfarë do të thotë të jesh shërbëtor i një francezi, pyet Edi Ramën dhe Hashim Thaçin! Në fund, do të kuptosh pse dështoi dialogu  Kosovë-Serbi në Shtëpinë e Bardhë nga diplomati i papërvojë Richard Grenell!

Çfarë do të thotë të jeshë francez sot?! Është e tepërt të shkruhet pas trilerit sociopolitik “Të egërit: Dasma” me autor francezin me prejardhje algjeriane, Sabri Luatah, ku përveç pyetjes se çfarë do të thotë të jesh francez sot, vë në pikëpyetje edhe identitetin kombëtar i cili po ndryshon kudo në botë, realitet të cilin francezët nuk po e pranojnë dot. Macron nuk e do Kosovën në  zonën Schengen dhe Turqinë në BE se janë mysliman, por ja që vjen dita, të paktën në imagjinatën e një shkrimtari për momentin, të ketë dhe kandidat për president mysliman. Me Ider Shaushin në librin e Sabri Luatahut ndodhë çudia, por zhvillimi real i ngjarjeve në këtë vend dëshmoi se Chirakun nuk e donin por ai u zgjodh për inat të babës Le Pen; As Macronin nuk e duan por ai zgjidhet për inat të rivalit të tij, të bijës Le Pen. Këta janë francezët! 

Policët francezë mund ta rrahin për vdekje në Gare du Nord të Parisit një afrikan pse nuk ka letërnjoftim, por nuk durojnë kur këtë e bënë policia amerikane në SHBA.

Francezët edhe kur mbështesin kandidatin e tyre për president, siç ndodhi me socialistët e “chic Segolene”, kur mbajti një tubim dhe shumë prej tyre ngelën jashtë. Segolen Royal ndonëse ishte e shoqëruar me kryebashkiakun e Parisit,  Bertrand Delanoë, dhe liderin e partisë François Hollande, që ishte dhe partneri i Segolenit, nuk arriti të kënaq orekset e të pranishmëve e në veçanti atyre që ngelën jashtë. Ithtarët filluan të bërtasin “Segolene, gënjeshtare! Segolene, gënejshtare!”, dhe kur “genjshtarja” nuk i përfilli sërish filluan të gërthasin por tani: “Segolene kurvë”!

Njëri nga zyrtarët e partisë i kërkoi policisë të ndërhyjë meqë situata po ndizej, por ata ishin të prerë duke refuzuar:

Non!

Shpërtheu dhuna ndër socialistë, policia nuk lëvizi gishtin, madje dolën matanë rrugës, dhe kur një protestueses socialiste iu thye dora, dhunë isha e përmasave të jashtëzakonshme. Filluan të thyhen dyqanet dhe shtëpitë, dhe kur policia bëri hapin e parë për ndërhyrje protestuesit filluan të bërtasin:

“Police partout, justice nulle part!” /Lexo shqip: Polic kudo, drejtësi askund/.

Policët rrethuan protestuesit por nuk i prekën me dorë ndërkohë Segolene iku nga dera tjetër. Po kjo situatë u përsëritë me rivalin e saj, Nicolas Sarkozy edhe pse kishte qenë ministër i Brendshëm. 

Ndonëse ishte viti 2007 dhe francezët që nuk e donin më as veten, sipas sociologëve francezë, dhe drejtësi nuk kishte askund ndërsa fajësohej BE për situatën në këtë shtet, aty përveç diskriminimit racor dhe kombëtar ishte evident dhe ai territorial. Pra, filluan të gjykohen nga cila zonë vijnë, madje edhe nga cila zonë e Parisit!

Dhe, derisa gjithë këto marrëzira po ndodhnin në Paris, në Mitrovicë qytetarët kishin shkelur në vitin e tyre të tetë me ushtarë francezë kudo, dhe drejtësi askund! Serbët i vrisnin shqiptarët si minjtë, duke ngrënë bukë, duke pi ujë, duke ble bukë, dhe ushtarët francezë të KFOR-it kishin gjetur dhe një zgjidhje shumë më kriminale se paramilitarët e Beogradit: U shisnin bomba familjarëve shqiptarë të rrezikuar nga serbët në veri të Mitrovicës.

Dhe, për këta shqiptarë nuk u shqetësua njeri, u zhvendosën në jug të Mitrovicës e kudo, të dhunuar nga kriminelët serbë dhe me ndihmën ekskluzive të ushtarëve francezë të armatosur deri në dhëmbë. Ku ishin Hashim Thaçi e Edi Rama nuk e di, me shqiptarët tashmë refugjatë në Kosovë, jo! Ata u bënë që të dy kryeministra,  ndërtuan shtëpi për veten e tyre por jo për ata shqiptarë që ngelen rrugëve, dhe nuk është se i qanë hallin liderëve francez; Sepse, ushtarët francezë u bënë edhe më të poshtër dhe Mitrovica u nda!

Kur e pyeta një major francez që kishte shërbyer në Mitrovicë ndërsa ishim duke marrë pjesë në një konferencë të NATO-s në Mal të Zi, rreth trazirave të vitit 2004, më dha një përgjigje shumë të sëmurë:   

-Nuk di si ta them! Situata e sigurisë atje është e çuditshme. Ne i mbrojmë shqiptarët, ata në restorante mbajnë në meny “omletë amerikane” dhe nuk gjenë dot “omletë franceze”!

-Për këtë i ndihmoni serbët, i thashë me ironi!

-Jo, më tha, por duhet të jeshë mirënjohës.

-I Mitrovicës jam, s’mund të jem mirënjohës për atë që më ndau qytetin, ia preva! Majori francez u humb në turmën e pjesëmarrësve që po rrufisnin kafenë dhe po diskutonin, jo për omletë normalisht, por për Adriatik 3 sepse vetëm pesë prej tyre ishin francezë.

Dhe, deri sa në Kosovën e pasluftës serbët po vazhdon kurimin e imazhit të shtetit të tyre kriminal të ndihmuar nga Franca, liderëve shqiptarë iu shfaqën para syve akuza si trafiku i organeve, vrasja e serbëve të paarmatosur, “Shtëpia e Verdhë”, dhe ata ngelën të pashqetësuar ashtu si me ndarjen e Mitrovicës.

Kështu ndodhi edhe fundmajin e këtij viti kur kishte filluar përgatitja e dialogut Kosovë-Serbi në Shtëpinë e Bardhë dhe Kryeministri Edi Rama u nis drejtë Parisit. Truri i tij propagandistik e hodhi në tregun mediatik këtë udhëtim i cili u stolis me trafik droge e përralla të ngjashme nga politika ndonëse po zihej diçka shumë më e rëndë.

E deri sa Hashim Thaçi nuk do t’ia dinte se çfarë po ndodhë rrotull, francezët nuk po flenin gjumë duke analizuar menytë se kush ka “omletë amerikane”! Kështu ndodhi! Sërish një francez, edhe pse në Gjykatën Speciale të Kosovës, dhe pikërisht në momentin kur Presidenti i Kosovës ishte nisur në takimin historik në Shtëpinë e Bardhë dhe kishte paralajmëruar një Konferencë për Kosovën në javën e tretë të korrikut në Paris. U akuzua për krime lufte!

Tashmë ka ngelur të shohim se çfarë ka zier Emmanuel Macron me Edi Ramën në Konferencën e Parisit meqë tani është e qartë se si arritën ta bëjnë nul takimin në Shtëpinë e Bardhë; Por, ka tre ditë që ka ndodhë ky komplot ligjor, dhe të gjithë ngushëllohen me marrëveshjen që kanë arritur me Përfaqësuesin e Posaçëm të Presidentit të SHBA, Donald Trump, për dialogun Kosovë-Serbi, Richard Grenell, për ta shtyrë takimin.

Takimin mund ta shtyjnë, takimi edhe mund të mbahet në të ardhmen në Shtëpinë e Bardhë, edhe me Richard Grenellin e paaftë ama me francez nëpër këmbë.

Sa mund të ndikojë Prishtina dhe Tirana zyrtare në këto kushte kjo mbetet për tu parë, përderisa përfaqësohen nga Hashim Thaçi dhe Edi Rama. Por, gjendja nuk është vetëm e nderë sepse bisedimet për fatin e Kosovës janë pushtuar nga një infeksion shumë enigmatik: Français partout, justice nulle part!/ Lexo shqip:Francez kudo, drejtësi askund/