Francë – Kroaci, historia e finaleve favorizon kroatët debutues

Kupa e Botës 2018 do të ulë siparin pasditen e së dielës në Moskë, ndërsa kampionët e Botës të 1998-ës do të përballen me një Kroaci që do të bëjë paraqitjen e saj të parë në një finale të Botërorit.

Të gjithë prisnin që Franca të shkonte larg në Rusi dhe nuk është një surprizë që ata janë një nga finalistet, duke parë talentet e shumtë që kanë në dispozicion.

Ata kanë treguar se dinë si të fitojnë, pavarësisht se nuk kanë dominuar ashtu sikundër pritej. Kjo është ajo që kanë bërë në gjysmëfinalen e luajtur kundër Belgjikës. Samuel Umtiti ka qenë heroi i papritur i atij takimi, duke realizuar golin e vetëm të ndeshjes dhe duke i dhuruar “Gjelave” finalen. Pas atij momenti, lojtarët e Deschamps janë mbyllur në mbrojtje dhe kanë neutralizuar yjet e Belgjikës.

Eden Hazard pati pak momente të mira, por francezët kanë arritur t’i bllokojnë sulmuesit e kundërshtarit dhe t’i nxjerrin ata jashtë loje. Në momentet që belgët kanë çarë mbrojtjen e Francës, ka qenë Lloris ai që i ka ndalur ata me reflekset e tij. Në fund, “Les Bleus” e kanë merituar fitoren 1-0 dhe pasi kanë bërë një paraqitje të ngjashme edhe në fitoren 2-0 të marrë kundër Uruguait në çerekfinale, mund të thuhet se mbrojtja është pika e tyre më e fortë.

Kjo është diçka që do të kërcënojë shanset e Kroacisë për të ngritur kupën. Epoka e artë e bardhekuqve është drejt fundit, por Luka Modric ka qenë i vendosur të udhëheqë vendin e tij drejt suksesit në atë që pritet të jetë Botërori i tij i fundit. Mesfushori i Real Madrid ka qenë lideri i Kroacisë dhe e ka treguar përsëri të mërkurën këtë, teksa ka udhëhequr kombëtaren e tij në pjesën e dytë të ndeshjes së luajtur kundër Anglisë.

Kroatët kaluan në disavantazh në fillimin e ndeshjes, por arritën të përballonin sulmet e shumta të anglezëve në minutat e mbetura të pjesës së parë dhe u kundërpërgjigjën në të dytën. Ata kontrolluan takimin dhe merituan golin e barazimit të shënuar nga Ivan Perisic. Pavarësisht se kishin luajtur 120 minuta në dy ndeshjet e mëparshme, ata luftuan në kohën shtesë, me Mario Manduzkic që ka shënuar golin e fitores pas një përgjumje të mbrojtjes së “Tre Luanëve”.

Gjithsesi, Franca është një kundërshtar i ndryshëm nga anglezët, të cilët filluan të ndjenin presionin në pjesën e dytë dhe lanë Modric me shokë të kontrollonin gjithçka, por francezët nuk do ta bëjnë një gjë të tillë. Ata kanë qenë të shkëlqyer kundër Belgjikës dhe mund të bëjnë të njëjtën gjë kundër Kroacisë. Ivan Strinic është terrorizuar nga Raheem Sterling në pjesën e parë kundër Anglisë, ndërsa ylli i Manchester City nuk ka arritur të përfitojë nga kjo. Por, Franca ka një lojtar që nuk fal.

Kylian Mbappe do të jetë përballe Strinic dhe nëse mbrojtësi kroat do të luajë aq keq sa luajti kundër Sterling, ka shumë mundësi që Mbappe të gjejë rrjetën në finale. Gjithsesi, pritet që kjo sfidë të jetë shumë e fortë dhe barabartë, me dy formacionet që do të tregohen shumë të kujdesshme, duke parë se një gabim mund t’i kushtojë atyre Kupën e Botës.