Ftesa e Bardhit për takim, Berisha: Po do të marrim pjesë!
Sot Kryetari i Partisë Demokratike, Sali Berisha, iu përgjigj pozitivisht ftesës së Kryetarit të Grupit Parlamentar të PD për një takim më 5 Shtator me qëllim të unifikimit të opozitës për një përballje kundër Edi Ramës.
“Po do të marrim pjesë. Ne shkojmë aty dhe do të marrim pjesë. Edhe ftesën e konsiderojmë hap pozitiv dhe ne do të marrim pjesë,” duke shuar dhe kuriozitetin e mediave në shërbim të Edi Ramës ne ky takim do shërbej për negociata apo bashkim:
“Do ti mësoni që të gjitha në kohën e duhur, por ne i përgjigjemi pozitivisht ftesës,” tha Sali Berisha pas përfundimit të seancës parlamentare duke përsëritur se ky parlament është i ngritur mbi krimin, drogën, është parlamenti i vetëm në Europë në të cilin vjedhja, krimi, droga shndërrohen në votë dhe vota shndërrohet në krim.
“Është institucion i fatkeqësisë kombëtare, është institucion që të vetmin vendim që ka marrë, ka dyfishuar rrogat e tij, është institucion i cili ka kaluar me dhjetëra vendime të lotuara nga krimi dhe grupet kriminale, është institucion i cili ka bllokuar të gjitha nismat me rëndësi kombëtare. Nuk ka lejuar rezolutën për dënimin e gjenocidit serb në Kosovë dhe trojet shqiptare.
Është institucion i cili me qëndrimet e tij, jo që nuk i shërben integrimit, por i shërben dezintegrimit të Shqipërisë në BE dhe e lë në vend numëro. Është institucion i cili siç e dëgjuat përpiqet të përligjë gjithçka antikushtetuese, antiligjore të qeverisë dhe të mbulojë krimet e saj.”
Ndryshe, në cilësinë e Kryetarit të Grupit Parlamentar të PD, në nisje sesioni parlamentar, Gazment Bardhi ka thirrë për ditën e martë, datë 5 Shtator 2023, një mbledhje të përbashkët të të gjithë deputetëve të koalicionit “PD-AN”, duke besuar se shqetësimi për nevojën urgjente të unifikimit të opozitës bashkëndahet nga çdo deputet që ndien përgjegjësinë për një përballje të unifikuar kundër Edi Ramës, me qëllimin e mirë të përcaktimit të agjendës dhe strategjisë së përbashkët të të gjithë PD dhe të gjithë opozitës parlamentare.
