Fundjavë në izolim, Rama: Dentistët, parukeritë, baret…

Duke nisur nga sot në orën 17:30, deri në mëngjesin e së hënës, vendi do të jetë në izolim. Këtë e konfirmoi kryeministri Edi Rama duke bërë të ditur se cilat janë ato zona ku lëvizja do të relaksohet. Ndërkoh ishte i prerë se klinikat dentare, parukeritë, baret dhe restorantet nuk do të hapen, pasi janë me riskun më të lartë, për përhapjen e koronavirusit.

“Fundjava do të jetë e bllokuar. E shtuna e diela, e bllokuar. Të gjithë në shtëpi. Përveç atyre që janë në punë. Jemi në situatë pozitive. Por situata pozitive është e përmbysshme.”

Për zonat me risk të ulët, që i përcaktoi vetë Baba, do të bëhet relaksimi i lëvizjes.

“Kancelarja gjermane na ka vënë në dispozicion një grup ekspertësh gjermanë, me kërkesën time. Mos përdorni kot më kot shembuj Gjermania, Suedia, Norvegjia etj. Ua konfirmoj se edhe me ekspertë gjermanë kemi provuar saktësinë tonë strategjike. Ekspertët që kanë mandat institucional na kanë dhënë të drejtë.

Nga fillimi i javës tjetër do ketë relaksim më të madh në disa zona të vendit, jo në Tiranë, ku ka shumë popullatë. Do lejohet lëvizje e relaksuar ku ka risk të ulët. Qarku Gjirokastër e qarku Dibër do jetë zonë që do ketë më shumë lehtësim lëvizjesh, edhe Divjaka, Saranda, Himara do kenë liri lëvizjeje. Pogradec, Përrenjas e Librazhd janë po ashtu zona me rrezik të ulët.”

Ndonëse u krijua bindja se gjuha e Kryeministrit ishte relaksuar ai sërish iu kthye të vdekurve.

“Ju lutem shumë ndërgjegjësohuni e kuptoni se koronavirusi ka ardhur këtu për të na shtuar hallet, por padyshim që ne do të trajtojmë sic duhet. Ekonomia ngrihet e bie, të vdekurit nuk ringjallen dot më. Sa më shumë të hapemi, kërkohet balancë më e fortë. Individi duhet të ketë një rol të rëndësishëm, i secilit prej nesh.”

Me këtë rast Edi Rama e bëri të qartë se cilat do të jenë ata biznese që nuk do të hapen:

“Dentista, parukeri, bar, ristorante, janë me riskun më të lartë, nuk do të hapen. Sa i përket hapjes së kufijve mes vendeve, këtë gjë nuk e di askush. Edhe Kosova po kalon një situatë jo të lehtë, por për fat të mirë kemi numra që nuk na kërcënon sistemin shëndetësor,” tha Kryeministri ndërsa për punonjësit e transportit publik, sqaroi se të gjithë shoferët, fatorinot, punonjësit e transportit urban, do të përfitojnë pagën e luftës nga paketa e parë. Ndërkohë premtoi pagë nga paketa e dytë edhe për naftëtarët e Ballshit.

“Do marrin pagë nga paketa e zgjeruar edhe për naftëtarët e Ballshit, kam dashur gjithmonë t’i ndihmoj po ajo është një histori private dhe shumë e ndërlikuar.”

Pyetje: Ne që kemi vite pa punë çfarë page do të marrim?

Rama: Ju nuk do të merrni asnjë pagë, se nuk është bërë deti kos t’i kthehemi gjithë papunësisë në 30 vjet. Ndihmojmë ata që janë në vështirësi, që kanë mbyllur punën për shkak të situatës.

Pyetje: Lokalet e natës kur do të hapen?

Rama: Nuk do të hapen.

Pyetje: Kush i paguan sigurimet?

Rama: Paga që merr është pagë direkte për ty.

Pyetje: Si të shkoj në Greqi se po humbas punën?

Rama: Jemi duke pritur të konkludojmë me kryeministrin e Greqisë pë rata që kanë punë sezonale.

Pyetje: Ne të rinjtë kur do të dalim xhiro?

Rama: Është e dhimbshme kjo, nuk e them për të qeshur, por pak nga pak. Në ato zona që do të hapen nga java e ardhshme, do të mund të dilni xhiro, por do të jetë vetëm me një person tjetër, në distancë, jo grumbullime nëpër parqe, jo piknik, etj.

Pyetje: Berberët kur do të hapen, ti ku qethesh?

Rama: Nuk po ju them si e ku qethem, se do filloni të bëni nga ato historitë jo bunkeri, jo Surreli.

Shqiptarët, përsëriti Edi Rama, duhet të mësohen të jetojnë me realitetin e ri deri sa të zbulohet një vaksinë.

“Lëvizja me automjet privat jo për punë do të lirohet kur ta kemi situatën më mirë. Do ta kemi në ato zona ku do të pilotojmë një hapje më të madhe për të kuptuar a do kemi apo jo valë të re nga virusi. Nuk ikën ai nëse ne rrimë në shtëpi, por duke qënë në shtëpi nuk i japim mundësi të na hidhet. Në momentin që dalim ne ekspozohemi. Duhet të jemi ne të ndërgjegjshëm se nuk mund t’i vëmë gjithësecilit ushtarë dhe polic te kok. Deri kur të dalë vaksina normaliteti nuk do jetë më si më përpara, harrojeni! Normaliteti i ri do të jetë ndryshe edhe kur të dalim, do dalim por do sillemi ndryshe.”