Fundoset anija më e madhe e forcave detare të Iranit

Anija më e madhe e forcave detare të Iranit u fundos në Gjirin e Omanit, pasi fillimisht u përfshi nga flakët, në rrethana ende të panjohura.

Zjarri shpërtheu në dhomën e motorit, thanë forcat detare , por nuk dha më shumë detaje.

“Zjarrfikësit luftuan 20 orë për të shuar zjarrin”, thuhet në deklaratë ndërsa mediat iraniane raportojnë se zjarri nisi rreth dy orë pas mesnatës së shkuar.

Sipas forcave detare, 20 marinarë nga një ekuipazh prej 400 vetësh, kanë pësuar lëndime sipërfaqësore, përpara se të shpëtoheshin të gjithë.

Anija ndodhej afër portit iranian Jask, rreth 1,270 kilometra në juglindje të Teheranit, pranë ngushticës strategjike të Hormuzit. “Anija stërvitore”, siç iu referua media shtetërore iraniane, u ndërtua në Britani në vitin 1977. Ajo u bë pjesë e forcave detare iraniane në vitin 1984.

Anija, raporton RFE, mbante emrin e ishullit ku ndodhet terminali kryesor i naftës në Iran – Kharg.