Furnizonte me kokainë gjithë ishujt grekë, goditet banda shqiptaro-serbe

Një bandë shqiptaro-serbe është goditur gjatë mbrëmjes së kaluar në Selanik të Greqisë. Mediat greke raportojnë se banda ishte pjesë e një rrjeti ndërkombëtar të trafikut të drogës ndërsa është goditur nga një aksion i oficerëve të policisë të Nëndrejtorisë së Prokurorisë së Drogës në Selanik dhe ata të Agjencisë amerikane DEA.

Nga super-aksioni janë sekuestruar 324 kg kokainë dhe janë arrestuar tre shtetas, shqiptarë dhe serbë, të cilët ishin dhe anëtarët kryesorë të bandës, baza e së cilës ishte në Athinë.

Një shtetas i katërt, pjesë e bandës, është identifikuar, por ka arritur t’i shpëtojë prangave të policisë, duke u hedhur nga ballkoni në ballkon në lagje, ndërsa policia vijon kërkimet për kapjen e tij.

Sipas policisë greke, anëtarët e këtij qarku kanë furnizuar me kokainë të gjithë ishujt grekë. Gjatë operacionit u sekuestruan 324 kg kokainë e pastër në 250 pako, mbi 5 mijë euro, 5 celularë dhe 1 kompjuter. Ndërkohë, vijon operacioni për kapjen e të tjerë personave të përfshirë në trafikun e kokainës./BW/