“Fushata Veliaj”/ Përgojon biznesin më të njohur në Dhërmi, ndryshon Ditën e Verës por jo edhe…
Fushata e rilindjes për të bindur qytetarët në paligjshmëri është po aq e frikshme sa edhe refuzimi i Dekretit të Presidentit i cili është publikuar në Fletoren Zyrtare për të anuluar datën e zgjedhjeve 30 Qershor. I tillë është rasti me kandidatin rilindas për Bashkinë e Tiranës, Erion Veliaj, i cili në mungesë të punës dhe premtimeve të mbajtura gjatë mandatit tij të parë, merret me akuza ndaj opozitës madje përgojon edhe bizneset e njohura shqiptare që kanë bërë të njihet edhe Shqipëria dhe bregdeti shqiptar.
Kështu, i përmbajtur nuk u tregua as para katundarëve të Pezës të cilët nuk kanë bukë për të ngrënë ndërsa ky u fliste se si liderët opozitar nuk bëjnë asgjë por pijnë koktaile 15 mijë lekëshe. Dhe, ky që flet për lulëzimin e turizmit në Tiranë, nuk tregohet i përmbajtur por përgojon biznesin më të njohur në Dhërmi ndërsa akuzon opozitën se po kërkon me çdo kusht që të pengojë punët e mira që janë bërë në Tiranë dhe reformat e ndërmarra nga qeveria, ndërsa i tremben gjykimit të së shkuarës së tyre 30 vjeçare nga institucionet e reja të drejtësisë.
“Lulit me shumë gjasë po t’i thuash shko në Pezë, nuk e di ku të marrë kthesën. Janë pa lidhje me realitetin. E sigurt që nuk i njeh, e sigurt që ngatërrohet rrugës, por mirë që vetë nuk vijnë, mirë që këta njerëz nuk i ka takuar, mirë që një gozhdë nuk e ka prekur, mirë që e kishin Tiranën dhe u mbushi qytetin me plehra, mirë që e kishin Shqipërinë dhe vetëm vranë njerëz, vetëm shkatërruan financat me piramidat, vetëm duke i gjuajtur Kryeministrisë me antitank në ’98, me molotov në 2019, po këta nuk të lejnë as ty të punosh,” vazhdoi me demagogjinë Erion Veliaj por ç’lidhje ka “Folie Marine” me katundarët e Pezës që duan bukë dhe ujë këtë vetëm ai e di:
“Nga i pari i tyre, që e kishim president, që kapej me këndet e lodrave, dhe deri te më i vogli që thotë “Rama ik” me Range-n më të fundit për të protestuar për varfërinë, me celularin më të fundit për të protestuar varfërinë. Mbaron “Rama ik” dhe janë të gjithë në Dhërmi, te “Folie Marine”, ku bën 15 mijë lek një koktail!”
Dhe jo vetëm kaq!
Njeriu që u përcaktoi shqiptarëve Ditën e Verës pa pyet njeri, sot u thotë se dita e zgjedhjeve nuk ndryshohet sepse, sipas tij, bëhet me qëllim që të pengohet Partia Socialiste:
“Këta thonë, meqë ne jemi komplet të paaftë, meqë ne nuk prekim dot punë me dorë, meqë ne nuk dimë të bëjmë diçka të mirë për vendin, mos e bëni as ju. Ata thonë mos shkoni ju në datë 30 Qershor. Kjo është si të them unë, Konferenca e Pezës që është në shtator, hajde ta bëjmë në tetor. Kjo e para e punës është fyerje, se konferenca është bërë në një datë. Ka një datë. Kjo është si t’i thuash një gruaje shtatzënë: “O grua nuk jemi gati, e shtyjmë edhe nja dy-tre muaj lindjen e fëmijës”. Kjo është si të shkosh në fushë, tani që vjen korriku e që korret gruri, edhe të thuash: “sa po përtoj sot, a i themi grurit të presë, e korrim në tetor-nëntor, kur të jemi gati”. Ata nuk e kuptojnë se po nuk u bë puna kur duhet, prishet. Ky është thelbi,” tha Erion Veliaj në Pezë duke sqaruar më në fund pse e ndryshoi Ditën e Verës nga 14 Marsi në 17 Mars, meqë u pa se nuk ishte punë shiu!
Pra, Erion Veliaj e pranon se Dita e Verës ndryshoi nga 14 në 17 Mars sepse është komplet i paaftë, nuk prek dot punë me dorë, nuk din të bëjë diçka të mirë për vendin, dhe ai nuk e kupton se po nuk u bë puna kur duhet, prishet. Ky është thelbi!”
