Fushatë e ashpër, Rusia: Problemi në Ballkan janë ekstremistët kosovarë
Perëndimi është bashkëpunëtor në ndezjen e zhvillimeve të fundit në Ballkan dhe për shkak të kësaj ekstremistët kosovarë mund të ndezin një konflikt atje në çdo kohë, tha sot zëdhënësja e Ministrisë së Jashtme ruse, Maria Zakharova.
“Situata në Ballkan po përkeqësohet, fitili i ‘fuçisë së barutit të Evropës’ ballkanike mund të ndizet në çdo moment si pasojë e veprimeve të ekstremistëve kosovarë me pajtimin ose nxitjen e drejtpërdrejtë të patronëve të tyre perëndimorë,” konstaton diplomatja ruse për “Telegram” duke shtuar se “radikalët shqiptarë po përpiqen me këmbëngulje të heqin qafe serbët e Kosovës”.
Zakharova kujtoi se forcat speciale kosovare “pushtuan” zonat e banuara nga serbët, duke iu referuar veriut të Kosovës, dy herë brenda një periudhe të shkurtër këtë vit. Ajo kësaj pjese të territorit të Republikës së Kosovës i referohet si territor “autonom përbrenda Serbisë”, e madje thotë se këtë e potencon edhe ligji ndërkombëtar.“Burimi i problemeve janë ultranacionalistët shqiptarë, të cilët morën në dorë Kosovën dhe po ushtrojnë pushtetin e tyre në prag të zgjedhjeve lokale të planifikuara për 14 nëntor. Ata po ndihmohen dhe përkrahen nga shtetet perëndimore, veçanërisht nga ata që lëshuan agresionin e NATO-s kundër Jugosllavisë në vitin 1999 duke synuar ndarjen e Kosovës nga Serbia pavarësisht humbjeve të shumta njerëzore.”
“Perëndimi po përpiqet ta bëjë Serbinë të braktisë interesat e saj kombëtare dhe kujtesën historike,” thekson ajo dhe duke cituar zyrtarë të Beogradit, zëdhënësja ruse fajësoi Mbretërinë e Bashkuar për nxitjen e konfliktit të Kosovës.
“Instruktorët britanikë po trajnonin personelin e policisë kosovare, ndërsa agjentët e fshehtë monitoruan situatën në komunat veriore, duke bërë fotografi dhe video të protestuesve serbë gjatë përleshjeve,” tha zyrtarja ruse e MPJ-së duke shtuar se planet agresive kosovare nuk përfundojnë me këto episode.
“Në mesin e caqeve të radhe është trafostacioni në Valaç. Përmes kësaj qendre energjetike bëhet furnizimi me rrymë i pjesëve serbe të rajonit, dhe menaxhohet nga kompania ‘Rrjeti Elektrik i Serbisë’”.
“Nuk është fshehtësi se një nga prioritetet kryesore të lidershipit të Kosovës, të udhëhequr nga ‘kryeministri’ A. Kurti dhe partia e tij nacionaliste ‘Lëvizja Vetëvendosje’ në rrugën drejt ‘demarkimit final” nga Serbia është famëkeqja ‘pavarësia energjetike’. Është ‘Valaçi’ që parandalon Prishtinën në kompletimin e izolimit të tij. Në të njëjtën kohë, ka shumë gjasa që nëse nënstacioni bie në duart e kosovarëve, serbët në veri të regjionit do të mbesin pa elektricitet”, u shpreh zëdhënësja e MPJ-së ruse, Maria Zakharova.
Reagimi i Moskëz zyrtare vjen pas intervistës së Kryeministrit të Kosovës, Albin Kurtit, në BBC, ku u shpreh se nuk do të lejojë bosnjëzimin e Kosovës. Reagimin e saj, Zakharova e nis me pyetjen: “Vëmendje BBC: Ku jeni ju, talentë?”
Kurti për “Hard Talk” në BBC tha se Serbia dëshiron që Kosova të bosnjëzohet, por se ai nuk do të lejojë të ndodhë kjo, pavarësisht nëse është në pushtet ose në opozitë ndërsa e saktësoi se Asociacioni i Komunave me Shumicë Serbe nuk do të ndodhë, pasi kjo ishte edhe arsyeja se pse ai u votua.
“Kur Asociacioni nuk u implementua, asnjë serb në Kosovë nuk protestoi. Ishte Beogradi që u zemërua. Në vitin 1991, më 26 prill, 14 komuna me shumicë serbe në Bosnjë-Hercegovinë u bënë bashkë dhe krijuan Asociacionin. Më 9 janar 1992, e shpallën pavarësinë, më 28 shkurt 1992, e bënë Kushtetutën e tyre, më 14 dhjetor 1995 në Dejton arritën njohjen ndërkombëtare. Duan ta përsëritin Bosnjën në Kosovë. Nuk do ta lejoj këtë, pavarësisht nëse jam në opozitë apo në qeveri. Për këtë më votuan njerëzit, të parandaloj bosnjëzimin e Kosovës,” është shprehur Albin Kurti duke përfunduar:
“Jam i bindur se me programin tonë do të ndihmojmë serbët po aq sa shqiptarët. Nëse pyesni serbët në Kosovë se cilat janë shqetësimet e tyre kryesore, ata thonë punësimi dhe drejtësia. Beogradi dëshiron të ketë shtet brenda një shteti. Shtetin e Serbisë brenda Kosovës së pavarur.”
