“Futi sende të ndaluara në qeli”, SPAK i shton një akuzë të re Erion Veliajt

SPAK i ka komunikuar sot Kryetarit të Bashkisë Tiranë, Erion Veliaj, një akuzë të re, lidhur me futjen e sendeve të ndaluara në ambientet e paraburgimit.

Erion Veliaj ka përdorur telefonin e një polici dhe ka bërë telefonata, gjatë kohës që e kanë shoqëruar për në ambientet e paraburgimit. Fakti që telefoni është përdorur në automjetin me të cilin po transferohej kryebashkiaku, konsiderohet si futje e sendeve të huaja në ambientin e paraburgimit, pasi automjeti është nën juridiksionin e këtij të fundit.

Sot, Kryetari i Bashkisë Tiranë, Erion Veliaj, ishte për 90 minuta në Prokurorinë e Posaçme , ku u pyet nga prokurorët lidhur me hetimet që po zhvillohen ndaj tij.

Kjo është hera e parë që Kryetari i Bashkisë Tiranë merret në pyetje pas caktimit të masës së sigurisë “arrest me burg” nga gjykata dhe transferimit të tij në paraburgimin e Durrësit.

Marrja në pyetje e Erion Veliaj, i cili ndodhet në burg prej 10 Shkurtit, është bërë në prani të avokatëve të tij Ermir Beta dhe Artur Selmani.

Ndryshe, Kryetari i Bashkisë Tiranë, Erion Veliaj, akuzohet për veprat penale të “korrupsionit pasiv të funksionarëve të lartë shtetërorë ose të zgjedhurve vendorë”, në 9 raste si dhe “pastrimit të produkteve të veprës penale ose veprimtarisë kriminale”.