G7 ofron 22 milionë dollarë për rajonin e Amazonës

Liderët ndërkombëtarë janë pajtuar në samitin e shtatë vendeve më të industralizuara, G7, që të ofrojnë ndihmë logjistike dhe financiare për të ndihmuar në fikjen e zjarreve në rajonin e Amazonës.

Presidenti francez, Emmanuel Macron tha se këto shtete do të ofrojnë 22 milionë dollarë, raporton RFE.

Marrëveshja ka ardhur teksa liderët e Kanadasë, Francës, Gjermanisë, Italisë, Japonisë, Mbretërisë së Bashkuar dhe Shteteve të Bashkuara kanë vazhduar takimin e tyre treditor në Biarritz të Francës.

Macron ka thënë se fondet do të jenë të qasshme “menjëherë”.

“Franca po ashtu do të ofrojë mbështetje konkrete me ushtrinë në rajon brenda disa orëve,” tha Macron.

Ndërsa Kancelarja gjermane, Angela Merkel, tha se shteti i saj dhe të tjerëve do të bisedojnë me Brazilin për shpyllëzimin në rajonin e Amazonës, pasi të shuhen zjarret.

“Natyrisht ky është territor brazilian, mirëpo ne kemi pyetje për këtë rajon, pyetje të nivelit global,” tha ajo.

“Mushkëritë e gjithë botës janë prekur, andaj neve na duhet të gjejmë zgjidhje të përbashkëta.”

Papa Françesku po ashtu u është bashkuar zërave shqetësues për zjarret në Brazil, i cili gjendet në kufi me vendin e tij të lindjes, Argjentinën, dhe u ka bërë thirrje njerëzve të luten në mënyrë që “ato të kontrollohen sa më shpejt që është e mundur”.

Ai nga sheshi Shën Pjetri tha se ne të gjithë jemi të shqetësuar për zjarret në Amazonë ndërsa paralajmëroi se mushkëria e gjelbër është jetike për planetin tonë”.

Ndryshe, Bolsonaro ka njoftuar për dërgimin e 44.000 ushtarëve për të luftuar zjarret, mirëpo vetëm disa qindra prej tyre tashmë janë dërguar në rajonin e Amazonës.