Gabriel Escobar: Kosova të dalë me propozim për Asociacionin

SHBA është duke pritur nga Kosova një draft për atë se si do të duket Asociacioni i Komunave me Shumicë Serbe, si dhe për situatën në veri të Kosovës, tha I dërguari i Shteteve të Bashkuara për Ballkanin Perëndimor, Gabriel Escobar, në një intervistë për të përditshmen “Die Presse”.

Ai tha se Asociacioni përmendet në marrëveshjen e Brukselit, në konkluzionet e Këshillit Evropian dhe gjithashtu edhe në Marrëveshjen e Ohrit. I dërguari amerikan theksoi se nëse Kosova s’dëshiron një Republikë Serbe si në Bosnjë, atëherë duhet ta japë draftin e vet, ndërsa shtoi se është koha që ajo të tregojë se çfarë dëshiron ndërsa ishte i prerë:

“Asociacioni do të bëhet edhe nëse s’do Kurti, nuk varet nga ai!”

I pyetur se cilat janë hapat për të ulur tensionet në veri të Kosovës, Gabriel Escobar tha se duhet thyer ciklin e dhunës.

 “Qeveria e Kosovës nuk duhet t’i detyrojë kryetarët shqiptarë në veri të kalojnë nëpër zyra komunale, të cilat janë kaq simbolike për serbët. Megjithatë, puna administrative duhet të vazhdojë. Udhëheqja e Serbisë, nga ana tjetër, duhet të dërgojë mesazhin e qartë,” tha I dërguari i Shteteve të Bashkuara për Ballkanin Perëndimor, Gabriel Escobar, për “Die Presse” duke përfunduar:

“Dhuna nuk do të tolerohet – jo kundër forcës paqeruajtëse të KFOR-it dhe jo kundër policisë. Dhe atëherë duhet të kërkojmë një mënyrë për të krijuar besim më të madh – edhe nëse kjo do të thotë zgjedhje të reja për kryetar bashkie.”