Gara për hetuesit e BKH, nis intervistimi i kandidatëve

Pas kualifikimit të 55 kandidatëve të Byrosë Kombëtare të Hetimit, BKH, në testin e esesë, sot ka nisur intervistimi me gojë i një pjese të kandidatëve. Më pas, gara parashikon dhe testin e poligrafit dhe vetingun e kandidatëve.

Në kushtet kur BKH kërkon 60 hetues dhe në fazat e tjera mund të ketë sërish të skualifikuar, në përfundim të këtyre proçedurave gara pritet të rishikohet sërish për të plotësuar organikën.

Hetuesit e BKH-së kanë përgjegjësinë të kryejnë hetime penale nën drejtimin e Prokurorëve të Posaçëm dhe kanë statusin e oficerit të policisë gjyqësore. Sistemi i përzgjedhjes së hetuesve të BKH-së është një proçes sfidues mendor dhe fizik, i përgatitur për të gjetur kandidatët më të aftë dhe me integritet. Ata që janë të suksesshëm në proçesin e përzgjedhjes do t’i bashkohen një skuadre elitë që mbështet Prokurorët e SPAK të cilët do të ndjekin dhe hetojnë veprat penale në fushën e korrupsionit dhe krimit të organizuar, objekt i Ligjit nr 95/2016.