Gara për Kryeprokurorin/ KLP miraton emrat, ja 3 kandidatët dhe…

Këshilli i Lartë i Prokurorisë, KLP, ka miratuar sot emrat e 3 kandidatëve për Prokuror të Përgjithshëm të cilët plotësojnë kushtet ligjore për të vazhduar garën.

Në bazë të nenit 148/a të Kushtetutës, të nenit 22 të ligjit nr.97/2016 “Për organizimin dhe funksionimin e Prokurorisë në Republikën e Shqipërisë”, si dhe nenit 17/pika 4 të rregullores “Për kriteret dhe procedurën e përzgjedhjes së kandidatëve për Prokuror të Përgjithshëm”, Këshilli i Lartë i Prokurorisë vendosi miratimin e listës me emrat e kandidatëve për Prokuror të Përgjithshëm të cilët plotësojnë kushtet ligjore sipas rendin alfabetik si më poshtë:

1. Arta Marku

2. Fatjona Memçaj

3. Olsian Çela

Këta 3 andidatë do të vazhdojnë garën e mëtejshmë për pozicionin e Prokurorit të Përgjithshëm.

Ky vendim është miratuar me shumicë votash.

Ndryshe, mbledhja e KLP është mbajtur në praninë e 9 anëtarëve dhe në mungesë të anëtarëve Besnik Cani dhe Nurihan Seiti.

Këshilli i Lartë i Prokurorisë, në vijim të procesit të vlerësimit të kandidatëve për Prokuror të Përgjithshëm, më 13 nëntor 2019 duke filluar nga ora 9:30 do të zhvilloj intervistat me të tre kandidatët në garë sipas rendit alfabetik.

Në zbatim të nenit 19, pika 1 te rregullores “Për kriteret dhe procedurën e përzgjedhjes së kandidatëve për Prokuror të Përgjithshëm”, intervistat me kandidatët do të regjistrohen me audio dhe video. Kandidatët do të njoftohen nominalisht dhe në adresën e postës elektronike që ata kanë deklaruar në momentin e aplikimit.