Gara për Prokurorin e Përgjithshëm, kandidati i parë Olsian Çela

Kandidati i parë që u regjistrua në garën e hapur nga Këshilli i Lartë i Prokurorisë për pozicionin e Prokurorit të Përgjithshëm, është Olsian Çela.

Mësohet se Olsian Çela, i cili është aktualisht prokuror te Krimet e Rënda, ka dorëzuar dokumentacionin pranë KLP sot në mëngjes.

Këshilli i Lartë i Prokurorisë Këshillli pasi miratoi më 19 mars rregulloren mbi kriteret e përzgjedhjes së kandidatëve, hapi garën.

Koha për të aplikuar për pozicionin e Prokurorit të Përgjithshëm është 30 ditë. Më pas Këshilli, brenda 45 ditëve do të bëjë vlerësimin e tij mbi plotësimin e kushteve nga ana e kandidatëve si dhe do të zhvillojë seanca dëgjimore me ta.

Sipas Reformës në Drejtësi të vitit 2016, Prokurori i Përgjithshëm zgjidhet me tre të pestat e votave. Këshilli i Lartë i Prokurorisë i dërgon Parlamentit tre kandidatura. Nëse parlamenti dështon në zgjedhjen e njërit prej tre kandidatëve, brenda 30 ditëve nga marrja e propozimeve, atëherë emërohet automatikisht ai që është i renditur i pari në listë.