Gastronomët: Sonte në orën 20:00 të fiken dritat dhe muzika nëpër lokale

Shoqata e Gastronomëve të Kosovës ka ftuar sot të gjithë pronarët e lokaleve në Kosovë që në orën 20:00 t’i fikin dritat dhe muzikën për 5 minuta, në shenjë të një vjetorit të shfaqjes së pandemisë COVID-19 në Kosovë.

Përmes një FTESE PUBLIKE në rrjetin social “Facebook”, kjo Shoqatë përkujton njëvjetorin e përballjes me pandeminë COVID-19 me shumë viktima, punëtorë të papunë dhe biznese të falimentuara për shkak të kufizimit të lëvizjes për të parandaluar përhapjen e koronavirusit ndërsa e shoqëron me një video.

FTESË PUBLIKE

Të dashur gastronomë, punonjës, qytetarë të vendit,

Sot me 13 mars, po bëhet një vit që po përballemi me pandeminë Covid-19.

Shumë punëtorë të papunë, shumë biznese të falimentuara, e mbi të gjitha, shumë viktima të shkaktuara.

Për nder të të gjithë atyre që ishin në vijë të parë të frontit duke u përballur me të padukshmen e të dukshmen, Shoqata e Gastronomëve të Kosovës ju fton të gjithëve, që sonte në ora 20:00, T’I NDALIM DRITAT DHE MUZIKËN PËR 5 MINUTA në të gjitha lokalet e gastronomisë, në të gjitha hotelet, marketet, butiqet, shtëpitë, banesat, pra në tërë Kosovën.

Së bashku deri në fundin e kësaj beteje!