Gati Drafti/ Lulzim Basha takim me Grupin për Reformën Zgjedhore

Pas paralajmërimit të fundvitit se grupet e ekspertëve janë në fund të hartimit të Draftit për Reformën Zgjedhore dhe ai do të jetë gati në fillim të janarit, Kryetari i Partisë Demokratike, Lulzim Basha, pikërisht lidhur me këtë çështje sot ka zhvilluar një takim me Grupin e Punës për Reformën Zgjedhore.

Mësohet se në mbledhje është diskutuar për publikimin, së shpejti, të propozimeve të Partisë Demokratike për Reformën Zgjedhore, që do ti hapin rrugë një debati dhe konsultimi publik.

Me propozimet konkrete për Reformën Zgjedhore, Partia Demokratike synon, të nxjerrë në pah edhe angazhimin e opozitës përballë mungesës së vullnetit të Edi Ramës për të miratuar me konsensus një reformë zgjedhore në përputhje me rekomandimet e OSBE/ODIHR-it.

Ndryshe, në fund të viti të kaluar, në Kolegjin e Kryetarëve të kryesuar nga Kryetari i Partisë Demokratike, Lulzim Basha, u bë e qartë se grupet e ekspertëve janë në fund të hartimit të draftit për reformën zgjedhore dhe ai do të jetë gati në fillim të janarit.

“Do të bëhet prezantim publik dhe njëherë do t’i bëhen të ditura të gjitha strukturave të PD dhe qytetarëve. Pas prezantimit, këto propozime do t’i nënshtrohen një konsultimi të gjerë për të marrë mendimin e anëtarësisë dhe qytetareve edhe për sa i përket aspekteve të tjera të reformës siç është sistemi zgjedhor.”

Kryetari i Partisë Demokratike ka kërkuar nga krerët e degëve që të jenë gati me të gjitha strukturat, që të monitorojnë zhvillimet politike në janar në mënyrë që më pas të përcaktohet edhe agjenda.

“Ne duhet të dëgjojmë zërin e qytetarëve, duhet të bëjmë konsultim të gjerë me ta dhe më të gjitha grupet shoqërore në çdo cep të vendit. Për të vendosur reagimin nëse kjo qeveri nuk do të pranojë draftin tonë për reformën zgjedhore, do të vazhdojë të vjedh dhe të abuzojë bashkë me krimin në Shqipëri.”