Gati për luftë, beteja për Kashmirin!

Pasi Qeveria e Indisë revokoi statusin special të Kashmirit, të administruar nga India, tensionet në mes të Pakistanit dhe Indisë arritën kulmin.

Pakistani tha se e “dënon me forcë” vendimin e Indisë për revokimin e statusit të veçantë të rajonit të Kashmirit ndërsa ushtria indiane tashmë ka shpallur gatishmërinë në nivelin e luftës.

35 mijë ushtarëve që ndodhen në Kashmir do ti bashkohen edhe 8.000 ushtarë që tashmë kanë filluar dislokimin.

Nga mëngjesi avionët transportues kanë filluar të sjellin ushtarët në aeroportin e kryeqendrës së rajonit Srinagar ndërsa televizioni publik raporton se përveç përforcimit të kontigjentit ushtarak që ndodhet në Kashmir, e gjithë ushtria është në gatishmëri lufte.

Në këtë situatë, ky tension ka shqetësuar edhe rajonin duke pasur parasysh se si India ashtu dhe Pakistani kanë armë bërthamore.

Ndryshe, Nju Delhi e ka arsyetuar vendimin si përpjekje për të integruar plotësisht rajonin e vetëm me shumicë myslimane. Por, Islamabadi reagoi menjëherë duke e kundërshtuar vendimin.

“Si palë në këtë mosmarrëveshje ndërkombëtare, Pakistani do të ushtrojë të gjitha mënyrar e mundshme për të kundërshtuar këto hapa të paligjshëm,” tha ministria e jashtme e Pakistanit përmes një deklarate.

Tensionet në mes të Islamabadit dhe Nju Delhit janë rritur prej 14 shkurtit, kur një sulm vetëvrasës ka lënë të vdekur 41 ushtarë indianë në Kashmir. Përgjegjësinë për sulmin e mori grupi militant, Jaish-e-Mohammad , JeM.