Gati për luftë/ Rama kërcënon Metën: S’ke të drejtë të rrish më në atë zyrë!

Pas vendimit të Presidentit të Republikës për anulimin e datës së zgjedhjeve 30 Qershor, Kryeministri Edi Rama e konfirmon atë që vazhdonte ta përsëriste me muaj të tërë, se nuk ka krizë politike në Shqipëri.

Jo pra, nuk ka krizë politike, kriza e ka emrin Edi Rama!

Pasi i pushtoi të gjitha institucionet, dhe ishte vetëm Presidenca ku ishte infektuar me rilindje por jo edhe e pushtuar, sot ai e bëri të qartë nga Burreli se dje Ilir Meta e ka shkruar vetë fatin e tij dhe se e ka humbur të drejtën të qëndrojë më në atë zyrë.

Pra, Edi Rama refuzon zgjidhjen paqësore, ai madje u shqetësua pse Policia e Ish-Gjeneral Sandër Lleshajt nuk e mbushi mbrëmë Spitalin e Traumës me “jorilindas të riedukuar”, me gjak dhe me arrestime, dhe nga retorika se ka një “datë të zgjedhjeve”, një ditë pasi kjo datë nuk ekziston më, kaloi në retorikë lufte, atu ku ishte nisur me bandat e krimit që në vitin 2017:

“Dje papritur për shumëkënd por krejtësisht sipas parashikimeve tona dhe të mia, u shfaq shpëtimtar i atyre që kishin mbetur atje në rrugë, as më shumë e as më pak por Presidenti i Republikës duke paralajmëruar një akt që politikisht është vetëvrasje, ligjërisht është nul, nuk ekziston dhe moralisht është turp si s’ka më turp,” tha Edi Rama duke deklaruar atë që tashmë të gjithë e kanë pritur që nga viti 2017 kur braktisi Qeverinë me Ilir Metën, shkarkimin e Presidentit të Republikës, ndërsa përsëriti atë që kurrë nuk e ka besuar, zgjedhjet do mbahen më 30 Qershor:

“Dhe mos u çudisni nëse ju them se nga fronti i shpëtimtarit të opozitës s’kemi parë gjë akoma. Nuk është çmenduria e fundit do ketë edhe të tjera por ama një gjë është e sigurt. Do apo s’do Saliu, do apo s’do Iliri, do apo s’do Lulzimi, do apo s’do filaxhani zgjedhjet do mbahen më 30 qershor.”

Dhe, sot më qartë se kurrë, dha mesazh lufte për opozitën dhe jo vetëm, që nuk kanë parë asgjë akoma, se të gjithë ata që udhëheqin lëvizjen Rama ik, do ikin një nga një vetë:

“Kushtetuta e Republikës nuk është filaxhan që rrotullohet, zgjedhjet nuk janë lloj i kafes turke që e kthen përmbys bashkë me filxhanin. Fatin e tyre politikanët e shkruajnë vetë. Dje Ilir Meta ka shkruar fatin e tij, si një president që e ka humbur të drejtën të qëndrojë në atë zyrë. Të gjitha ata që udhëheqin lëvizjen Rama ik, do ikin një nga një vetë.”