Gati rikthimi i taksës fikse 25 mijë lekë për bizneset e vogla; 1-8 mln lekë të ardhura, tatim mbi xhiron 2-4%

Reforma fiskale që qeveria synon të ndërmarrë në periudhën afatmesme 2022-2026 synon të heqë të gjithë stimujt e dhëna nga përjashtimet fiskale ndaj biznesit dhe gjithashtu të përfshijë në taksim biznesin e vogël.

Dokumenti zyrtar i Ministrisë së Financave, njoftoi se bizneset e vogla do të trajtohen me një skemë të thjeshtë, me prag të ulët të të ardhurave dhe me kërkesa më të thjeshtuara të mbajtjes së regjistrimeve. Në këtë kuadër për bizneset me të ardhura deri në 1 milion lekë, mund të aplikohet pagesë vjetore fikse tatimi (psh 25.000 lekë).

Ndërsa për tatimpaguesit, të cilët aktualisht janë të përjashtuar nga tatimi nëse kanë të ardhura deri 14 milion lekë në vit, nuk paguajnë tatim mbi fitimin neto, sugjerohet që për tatimpaguesit me të ardhura deri 8 milion lekë në vit, të prezantohet një regjim tatimor i thjeshtuar bazuar në aplikimin e një tarife 2-4% mbi të ardhurat bruto dhe jo të taksohen mbi fitimin neto.  Qeveria pret ti zbatojë këto dy masa pas tre vitesh.

Me këto masa qeveria mori në konsideratë rekomandimin e FMN për taksimin e biznesit të vogël me një tarifë vjetore fikse, e aplikuar me parë gjatë viteve 2000.

Strategjia Afatmesme Fiskale e Qeverisë  2022-2026, u hartua  me asistencën e FMN, por miratimi dhe zbatimi i saj u shty për shkak të pandemisë Covid-19.

Strategjia e re fiskale do të revizionojnë skemën e taksimit të bizneseve me të ardhura të ulëta, duke aplikuar skema të thjeshta taksimi me kuotë fikse dhe me % mbi të ardhurat bruto të biznesit.

Sistemi aktual i taksimit për bizneset e vogla në vendin tonë, është kompleks dhe kërkon mbajtjen e një niveli të caktuar regjistrimesh, i cili mund të mos jetë shumë i nevojshëm për këtë kategori biznesesh. Ky konstatim vjen edhe nga Raportet e FMN-së, ndërkohë që, sugjeron se duhet të rishikohet niveli i të ardhurave për përcaktimin e normës së tatimit të thjeshtuar mbi fitimin.

Në janarin e vitit 2021 shkalla tatimore për tatimin mbi fitimin dhe tatimin e thjeshtuar mbi fitimin e bizneseve të vogla, për tatimpaguesit me qarkullim, deri në 14 milion lekë në vit u, bë 0%. Me anë të kësaj incentive, tatimpaguesve me qarkullim nga 5-14 milionë lekë iu lehtësuat barra fiskale në kuadër të tatimit mbi fitimin dhe tatimit të thjeshtuar mbi fitimin, ku nga 5% tatim që paguanin më parë, (rreth 0.8 miliard lekë gjatë vitit 2019), nga 1 janari 2021 nuk paguajnë tatim mbi të ardhurat nga biznesi.

Pragu minimal i regjistrimit në tatimin mbi vlerën e shtuar u rrit nga 2 milion lekë qarkullim në një vit kalendarik, në 10 milion lekë. Ulja e pragut të regjistrimit për TVSH-në u miratua në kuadër të politikave fiskale të ndërmarra në mbështetje të krijimit të një kuadri ligjor mbështetës për tatimpaguesit që u përballën me vështirësi të mëdha dhe të tejzgjatura nga situata e krijuar nga pandemia COVID-19. Kontributi në TVSH i tatimpaguesve që për shkak të rritjes së pragut të regjistrimit dolën nga skema e TVSH-së llogaritej në rreth 3-4% të totalit të TVSH-së së arkëtuar.

Ministria e Financave referoi se, vitet e fundit janë realizuar ndryshime të shumta dhe të shpeshta të legjislacionit tatimor, përfshirë tarifat e tatimit dhe përjashtimet tatimore. Ndryshimet e shpeshta nuk kanë stimuluar qëndrueshmërinë e sistemit tatimor dhe kanë ndikuar edhe në uljen e performancës në mbledhjen e të ardhurave, por njëkohësisht kanë çuar në rritjen e kostove të administrimit nga administrata fiskale, por edhe të kostove të pajtimit të tatimpaguesve.

Ndonëse të ardhurat gjatë viteve të fundit kanë trend rritës, vihet re që rritja e të ardhurave rezulton me ritme rënëse. Nga ana tjetër objektivat për rritjen e shpenzimeve me rreth 2.00% – 2.55% të PBB-së, të nevojshme këto për stimulimin e zhvillimit ekonomik të vendit, kërkojnë rritjen e të hyrave buxhetore me ritme më të shpejta ku më e rëndësishme është rritja e të ardhurave tatimore. Në këtë kuadër lind nevoja e kalimit në fazë reformimi të sistemit tatimor, në harmoni me praktikat më të mira ndërkombëtare, reformë e cila do të ndikojnë në rritjen e të ardhurave tatimore dhe në vijimësinë e zbatimit të reformave të rëndësishme strukturore, raportoi Ministria e Financave./Monitor/