Gazetarja e RFE, Alsu Kurmasheva nderohet me Çmimin Ndërkombëtar për Lirinë e Shtypit

Alsu Kourmasheva, gazetare e Shërbimit Tatar-Bashkir të RFE, është nderuar me Çmimin Ndërkombëtar për Lirinë e Shtypit për vitin 2024 nga Komitetit për Mbrojtjen e Gazetarëve, CPJ.

Kurmasheva, e cila u lirua nga burgu në Rusi rishtazi pasi i kaloi 288 ditë në paraburgim, e falënderoi CPJ-në për përpjekjet e komitetit për ta siguruar lirimin e saj.

“Gazetaria nuk është krim,” tha ajo në ceremoninë e cila u zhvillua në New York, duke shtuar se më shumë se 20 gazetarë janë duke u mbajtur në burgjet e Rusisë.

Kurmasheva shtoi se çmimin ia ka kushtuar kolegëve të saj që janë ende në burg, përfshirë gazetarëve të RFE, Ihar Losik dhe Andrey Kuznechyk në Bjellorusi, Vladislav Yesypenko në Krime, dhe Farid Mehralizada në Azerbajxhan.

“Kolegët e mi nuk janë thjesht statistika. Sikurse unë, edhe ata janë qenie njerëzore dhe kanë familje, të cilat i duan ata dhe u mungojnë. Ka dhjetëra gazetarë të tjerë në burgjet ruse. Ata duhet të lirohen menjëherë,” tha Kurmasheva.

Këtë çmim e fituan këtë vit edhe gazetarja palestineze Shorouq al-Aila, gazetarja nga Guatemala Kimi de Leon, dhe gazetarja investigative nigeriane Samira Sabou, të cilët u nderuan për guximin e tyre për t’u përballur me përndjekjen.

Kurmasheva, me shtetësi ruse dhe amerikane, ishte ndaluar qershorin e vitit 2023 teksa po priste të kthehej në Pragë nga Kazani. Autoritetet ia konfiskuan të dy pasaportat dhe telefonin. Ajo u lirua nga ndalimi, por iu ndalua largimi nga shteti.

Pas pesë muajsh pritje për një vendim për rastin e saj, Kurmasheva u gjobit me 109 dollarë për dështim që të regjistronte tek autoritetet ruse pasaportën e saj amerikane.

Në pamundësi që të largohej nga Rusia, në tetor Alsu Kurmasheva u arrestua, u dërgua në burg dhe u akuzua se nuk ishte deklaruar si “agjente e huaj”.

Dy muaj më vonë, ndaj saj u ngrit akuza për shpërndarje të lajmeve të rreme për ushtrinë ruse.

Në korrik, një gjykatë në Kazan, e dënoi Kurmashevën me gjashtë vjet e gjysmë burgim.

Më 1 gusht, ajo u lirua gjatë këmbimit të të burgosurve, së bashku me shtetasit amerikanë, Evan Gershkovich dhe Paul Whelan./RFE/