Genc Nimanbegu zgjedhet kryetar i Komunës së Ulqinit
Kuvendi i Komunës së Ulqinit sot zgjodhi për Kryetar të Komunës së Ulqinit, Genc Nimanbegun.
Për Genc Nimanbegun nga radhët e Forcës së Re Demokratike votuan 20 këshilltarë të kuvendit, raporton Ulqini Online, ndërkohë nga posti i Kryetarut të Komun së Ulqinit u shkarkua Omer Bajraktari nga LQ URA.
Shumica e re parlamentare në Komunën e Ulqinit përbëhet nga Partia Demokratike, Forca, Partia Demokratike e Socialistëve, Socialdemokratët, Lidhja Demokratike në Mal të Zi, Partia Socialdemokrate dhe Partia Boshnjake.
Nga ana tjetër në opozitë, përveç Unionit Demokratik të Shqiptarëve dhe Demokratëve, të cilët nuk ishin pjesë e qeverisë as në dy vitet e mëparshme, do të jenë kolegët e tyre nga Lëvizja Qytetare URA dhe Alternativa Shqiptare.
Ndryshe, Genc Nimanbegu lindi më 6 shtator 1971 në Ulqin. Shkollën fillore dhe të mesme e kreu në Ulqin, ndërsa arsimin e lartë e filloi në Fakultetin Ekonomik në Dubrovnik, por për shkak të luftës në Ish-Jugosllavi, e vazhdoi në Fakultetin Ekonomik në Podgoricë, ku dhe diplomoi.
Genc Nimanbegu me një grup intelektualësh shqiptarë nga Ulqini, në vitin 2005, mori pjesë në krijimin e partisë shqiptare Forca e Re Demokratike – Forca, dhe u zgjodh nënkryetar i saj. Më 30 tetot 2021, zgjidhet kryetar i partisë Forca dhe aktualisht është deputet në Parlamentin e Malit të Zi, mandat të cilin për herë të parë e fitoi në vitin 2009. Në vitet 2016–2020, ishte Nënkryetar i Parlamentit të Malit të Zi. Ai u zgjodh kryetar i Këshillit Kombëtar të Shqiptarëve në Mal të Zi në vitin 2013, detyrë që e mbajti deri në vitin 2018.
