Gënjen “Sy m’Sy”, Rama: Unë nuk kam thënë kurrë që bonusi i pensionistëve jepet në shkurt!

Pas shtyrjes së dhënies së bonusit të pensionistëve, kryeministri Edi Rama, në rubrikën “Sy m’sy”, tashmë tha se do të jepet në pranverë pa dhënë një datë dhe mohon premtimin e dhënë më 8 Janar se ky bonus do të shpëndahet në muajin shkurt.

“Unë nuk kam thënë kurrë që bonusi i pensionistëve jepet në shkurt, kam thënë kemi një bonus pranvere. Nuk ka nevojë të ta them unë se pranvera ka ardhur në shkurti, bonusi do të jepet në Pranverë.

Është depozituar në BSH dhe do të lëvrohet në pranverë. Kur fillon pranvera? Pyet se ta thonë. Dhe pastaj nuk e di ku lidhet bonusi me spiun, armikun dhe tradhtarin,. Sikur të gjithë spiunët, armiqtë, e tradhtarët të ishin si unë do kishin shpëtuar nga armiqtë, tradhtarët dhe spiunët.”

Në 8 Janar 2025, Kryeministri Edi Rama në konferencën me gazetarët mbi uljen e çmimit të energjisë elektrike, tha se rritja e bonusit të pensioneve nuk është për fushatë elektorale ndërsa saktësoi se pensionistët do e marrin që në muajin shkurt dhe nuk kanë pse presin të mbarohen zgjedhjet.

“Pensionistët nuk do presin të mbarojmë zgjedhjet ne, do e marrin që në shkurt. Se si e mendojnë ata që mendjen e kanë mbrapsht kjo është festa e madhe e demokracisë. Kështu që nuk kam asnjë shqetësim.”

Të nesërmen e kësaj deklarate, 9 Janar 2025, Këshilli i Ministrave miratoi bonusin bonusin e pranverës për 730.430 pensionistë, bëri të ditur Ministri i Ekonomisë, Kulturës dhe Inovacionit, Blendi Gonxhja, duke saktësuar se do të nisë të shpërndahet me pensionet e muajit shkurt.