Gënjeshtra dhe prapë gënjeshtra, Tabaku: Koha për të zgjedhur po afron!

Gënjeshtra, gënjeshtra dhe prapë gënjeshtra! Ky është reagimi i Ish-Deputetes së Partisë Demokratike, Jorida Tabaku, pas deklaratës së Kryeministrit Edi Rama se në fund të vitit 2019 figurojnë 83 mijë të punësuar më shumë në biznesin e vogël, duke i bërë thirrje qytetarëve të shikojnë përreth.

“A shikoni më shumë njerëz në punë? A sheh njeri më shumë shqiptarë që jetojnë më mirë? Më shumë familje me frigoriferë dhe tryeza të mbushura plot?” thekson Jorida Tabaku duke shtuar se pas 7 vitesh me premtime të pambajtura, ka njeri që mund të besojë vërtet ato që dëgjon nga ky?

“Të gjithë shqiptarët e dinë se përsa kohë që do të vazhdojmë në këtë rrugë pa krye, nuk do të ketë as ndryshim, as rimëkëmbje ekonomike dhe as punë për ta,” tha në reagimin e saj përmes rrjetit social Facebook, Ish-Deputetja e Partisë Demokratike, Jorida Tabaku duke përfunduar:

“Koha për ndryshim po vjen. Koha për të zgjedhur po afron!”

Ndryshe, Kryeministri Edi Rama mëngjesin e sotëm e nisi me lajmin se në fund të vitit 2019 figurojnë 83 mijë të punësuar më shumë në biznesin e vogël:

“Duke vijuar me kokëfortësinë e shifrave të nxjerra jo nga fjalimet, kanalet e portalet, por nga regjistrat e llogarive të shtetit, ku në fund të vitit 2019 figurojnë 83 mijë të punësuar më shumë në biznesin e vogël, ju uroj një fundjavë të qetë,” tha Edi Rama duke e shoqëruar me grafik!