Genocidi serb, çmendet Vuçiç: Kanë dalë nga mali, kanë veshur kostume e kollare, dhe flasin kështu…
Doli në televizionin publik RTS të flas dukshëm i shqetësuar për Rezolutën për genocidin që kishte miratuar Parlamenti i Kosovës, por Presidenti i Serbisë, Aleksandar Vuçiç paralajmëroi se nga dita e hënë autoritetet kosovare pritet të arrestojnë në veri të Kosovës 26 policë serbë dhe 15 persona të tjerë me qëllimin, sipas tij, që populli serb të mbetet i pambrojtur.
Vazhdon ti qëndroj idesë për korrigjimin e kufijve, është i bindur se në Referendum serbët do të thoshin “JO” por ai është për “PO” edhe sot ndërsa është i sigurt se politikanët e Kosovës janë duke përgatitur skenarin e Kroacisë.
Foli për domosdoshmërinë që serbët të jenë të përmbajtur, por duke komentuar Rezolutën për genocidin serb në Kosovë, Aleksandar Vuçiç vetëm i tillë nuk ishte. Duke mos i pasur parasysh fare krimet serbe në Ballkan ai kritikoi popujt joserbë të këtyre trojeve se si nuk kuptojnë dhe nuk mund ta gjejnë rrugën drejt së ardhmes dhe i ofendon:
“Të vetmen rrugë që shohin është urrejtja ndaj popullit serb, edhe pse gjithmonë do të thonë se është kundër atyre që kanë kryer krime ndaj popullit të tyre. Dhe nuk mund ti kthehen as punës, as tregtisë, as ekonomisë. Disa vetëm kanë veshur kostumet, kanë vënë kollaret, dhe kanë dalë nga mali! Kutpohet që flasin në këtë mënyrë,” tha Vuçiç i shqetësuar si kurrë më parë, pas miratimit të kësaj Rezolute. Dhe jo vetëm kaq!
“Problemi është se Evropa dhe bota nuk kanë reaguar kur formuan Ushtrinë, kur refuzuan të formojnë Zajednicën, kur vendosën taksën reaguan të paktën formalisht, kur akuzonin serbët për çdo lloj krimi të mundshëm dhe nuk kishin asnjë dëshmi e i lironin, tani kjo Rezolutë,” tha Presidenti i Serbisë duke theksuar se Serbia kishte paralajmëruar për Rezolutë dhe miratimin e vendimeve tjera për të cilat çdo serb duhet të ketë frikë, dhe Serbia do të reagojë por duhet të jemi të përmbajtur, tha ai, në mënyrë që të mos humbim kredibilitetin që kemi si njerëz serioz tek bashkësia ndërkombëtare.
Për zgjedhjet e së dielës që priten të organizohen në veri të Kosovës, ai sërish akuzoi autoritetet kosovare duke theksuar se përmes “serbëve të paktë që kanë” do të tentojnë të provokojnë serbët në veri të Kosovës.
“I keni parë ca njerëz që janë angazhuar në skenën politike të Serbisë flasin se do të votojnë për kandidaten e Kadri Veselit, në mënyrë që të mos fitojë Lista Srpska. Madje kanë mbajtur edhe pankarta ‘Një nga pesë milionë’”, tha në diversionin e radhës Vuçiç ndërsa foli për arrestime ashtu si në prag të çdo zgjedhjeve lokale në komunat serbe në Kosovë vetëm se sot duke shtuar dozën e idiotizmit:
“Nga e hëna, sipas të dhënave tona, ata mendojnë të arrestojnë 26 pjesëtarë të policisë serbe nga veriu i Kosovës, dhe 15 persona të tjerë, në mënyrë që të mos ketë mbrojtje për veriun, me arsyetimin se kanë marrë pjesë në raste të ndryshme të korrupsionit. Dhe më pas, do të kishim aktin final të përpjekjes për qeverisje të plotë të hapësirës ku jetojnë serbët në Kosovë, për të thënë në fund, ju kemi sjellë para aktit të kryer si Kroatët para Operacionit Stuhia,” tha Presidenti i Serbisë duke vazhduar të ndjellë urrejtje edhe në prag të këtyre zgjedhjeve që organizohen vetëm për shkak të politikës së tij shoviniste ndaj popullit shqiptar, dhe destruktive ndaj shtetit të Kosovës.
