Gërvalla: Kosova është partnere e qëndrueshme në luftën kundër terrorizmit
Ministrja e Punëve të Jashtme dhe Diasporës e Kosovës, Donika Gërvalla, në takimin e Koalicionit Global Kundër Daesh, ISIS/ISIL, tha se Republika e Kosovës ka bërë hapa të rëndësishëm dhe të suksseshëm në luftimin e ekstremizmit të dhunshëm dhe është partnere e qëndrueshme në luftën kundër terrorizmit global.
Fjalën e saj, Gërvalla e nisi duke kthyer vëmendjen e të pranishmëve në faktin që shtetësia e Kosovës erdhi pas përjetimit të luftës dhe gjenocidit kundër popullatës civile, e cila u shpëtua vetëm falë një koalicioni të kombeve të civilizuara. Ajo theksoi që ky fakt është i rrënjosur thellë në kujtesën kolektive të qytetarëve të Kosovës.
“Si një vend i vogël me vetëm 1.9 milion banorë, jemi krenarë që jemi një partner i qëndrueshëm në këtë koalicion global. Kosova është një vend me një popullsi kryesisht myslimane. Por harmonia dhe toleranca jonë ndërfetare janë pjesë e identitetit tonë që prej shekujsh. Të shohësh një kishë dhe një xhami që ndajnë të njëjtin oborr, në Kosovë nuk është asgjë e jashtëzakonshme”.
Marrë në konsideratë këtë trashëgimi, Gërvalla tha se kur disa shtetas të Kosovës kishin nisur t’i bashkoheshin ISIS-it, institucionet e vendit kishin reaguar menjëherë. Ajo ka shpjeguar masat e ndërmarra për t’i mbajtur përgjegjës ata që kishin kryer krime në këtë drejtim. Në të njëjtën kohë ka theksuar edhe përkushtimin institucional për të riintegruar të gjithë të kthyerit.
“Jemi duke u përkujdesur posaçërisht për gratë dhe fëmijët e tyre. Ne duhet të bëjmë gjithçka që mundemi për t’i kthyer ata në një jetë normale, të shpresojmë, edhe një të ardhme të lumtur për ta. Ne jo vetëm që kemi arritur t’i kthejmë fëmijët në shkolla, por ofrojmë gjithashtu mbështetje edhe psikologjike për ta dhe për nënat e tyre. Për më tepër kemi krijuar programe për de-radikalizim, në të cilat përfshihen madje edhe personat që ndodhen në arrest,” tha shefja e diplomacisë kosovare duke folur dhe për kontributin përmes prezencës së trupave kosovare në këtë koalicion.
“Jemi shumë krenarë të kontribuojmë në këtë koalicion që nga ky vit me një numër simbolik të trupave tona. Falënderojmë Kuvajtin për mikpritjen dhe trupat amerikane për mbështetjen e ofruar për ushtarët tanë të guximshëm, si në rrafshin profesional ashtu edhe në atë personal,” tha Gërvalla duke siguruar që Kosova do të mbetet një partner serioz i koalicionit.
Ndryshe takimi i Koalicionit Global Kundër Daesh, ISIS/ISIL, po zhvillohet në Romë të Italisë në prani të Sekretarit amerikan të Shtetit, Antony Blinken, organizatorit të takimit, ministrit të Jashtëm të Italisë, z. Luigi Di Maio, Sekretarit të Përgjithshëm të NATO-s, Jens Stoltenberg, Përfaqësuesit të Lartë për Politikë të Jashtme dhe Siguri të BE, Josep Borell, si dhe Zv/Kryeministrave dhe ministrave nga e gjithë bota.
