Gishti i Ina Nukës dhe Grushti i Dritan Dajtit!

nga Agim Popoci

Kur policja Ina Nuka u plagos në krye të detyrës, Edi Rama u impenjua për kurimin dhe kujdesin e saj, për ti pasur zili çdo kryeministër në rajon dhe jo vetëm.

Por qytetarët në Shqipëri, nuk e morën seriozisht njeriun që tallet edhe me kufoma, duke e konsideruar si zakonisht manipulues i opinionit publik, dhe në këtë rast, me gishtin e Ina Nukës. Rilindasit u munduan atë botë të krijojnë një furtunë në gotë, por dështuan me sukses ndonëse kishte prej atyre që morën vrull kot, thuajse ditën që policja Ina u nis për Stamboll, ai u bë manipulues ose humanist.

Fati i Ina Nukës, pas fatkeqësisë që pësoi në një protestë me lëndimin e dorës, ishte se kryeministrit Edi Rama i duhej një viktimë në kohën kur e gjithë Shqipëria protestonte kundër tij. Dhe, policja Ina Nuka u kurua dhe për të u kujdes një shtet i tërë. Ndryshe, do të pësonte si shumë policë të tjerë, ose kolegë të Ina Nukës që jo pa gisht, por ngelën dhe pa kokë në krye të detyrës, dhe Edi Rama nuk do t’ia din fare.

I tillë është rasti me katër policët e vrarë në detyrë, në gushtin e vitit 2009 nga Dritan Dajti. Për të mos u marrë me statistika, meqë kryeministri nuk i ka shumë qejf, ky është një rast që ka të bëjë me Sistemin e ri të Drejtësisë që ngriti pikërisht kryeministri Edi Rama, ky që shpëtoi gishtin e Ina Nukës dhe që i lë të lirë vrasësin e katër policëve. Madje, nuk e ka pa të arsyeshme të bëjë as edhe një reagim në rrjetet sociale ku ai fle gjumë ndonëse njihet si “valet de plume”.

Njohësit e Sistemit të Drejtësisë që po krijonte Edi Rama, që në ditën e gjykimit nga Gjykata e Lartë kur ktheu Dosjen “Dritan Dajti” për rigjykim në Apel, paralajmëruan “lirimin” e vrasësit të katër oficerëve të policisë, Fatos Xhani, Sajmir Duçkollari, Altin Dizdari dhe Kastriot Feskaj. Por kjo u konsiderua si politikë për shumë arsye; Por, vendimi i Gjykatës së Apelit të Krimeve të Rënda që dje u bë publik, kalon të gjithë kufijtë e një Sistemi të Drejtësisë, qoftë ky edhe ai që e ka ideuar Edi Rama: Drejtësia që Duam!

Gjykata e Edi Ramës rrëzoi vendimin për burgim të përjetshëm për Dritan Dajtin dhe pranoi kërkesën për gjykim të shkurtuar, plotë 9 vjet pas vrasjes, një dënim i cili tashmë përkthehet në 25 vite burg. Dhe jo vetëm kaq! Kishte edhe nga ata policë idealistë, që mendonin se jo vetëm vrasësi Dritan Dajti por edhe ata që dekonspiruan aksionin e arrestimit e tij në gushtin e vitit 2009, do të myken në burg. Por, jo, Dritan Dajti sot vetëm sa nuk u dekorua nga kryeministri Edi Rama!

Grushti që Dritan Dajti i dha Reformës në Drejtësi, nuk është thjeshtë vetëm një dëshmi se Sistemi i Drejtësisë është i kapur nga kryeministri Edi Rama.

Grushti që Dritan Dajti i dha Reformës në Drejtësi, tregon se kryeministri Edi Rama mashtroi kur tha se fajet nuk i kanë njerëzit por sistemi. Krijoi Sistemi e ri të Drejtësisë, dhe janë njerëzit që vërbërisht po i shërbejnë, qoftë edhe duke i liruar vrasësit e policëve  

Mosbesimin e qytetarëve të Shqipërisë që patën tek Sistemi i Drejtësisë para se Edi Rama ti fuste fadromën, Grushti i Dritan Dajtit sot e shndërroi në një besim të palëkundur se Sistem i Drejtësisë që krijoi Edi Rama, është në duart e krimit.

Në fund, nga Gishti i Ina Nukës deri tek Grushti i Dritan Dajtit, Edi Ramën nuk e ndanë një det i tërë. Është po ai kryeministër që mburret me vettingun e prokurorëve dhe gjyqtarëve kur ata përfundojnë në rrugë, ashtu siç mburret me trupin gjykues kriminal, Fuat Vjerdhën, Lindita Hoxhën, Aleks Nikollin, Petrit Aliajn dhe Skender Daminin, që vrasësit të katër policëve, Dritan Dajti, i mundësuan gjykim të shkurtuar aq sa ishte gjykimi i tij shkurtë për të vrarë katër oficerët e policisë në detyrë. Dhe, jo vetëm kaq!

Sot, ky trup gjykues i kryesuar nga Edi Rama vrau edhe shpresën e atyre pak oficerëve të policisë që uniformën nuk ua veshi partia por ideali. Sot, ideali i këtyre pak oficerëve të policisë që ta zhveshin policinë nga krimi u hodhë në Lanë. Jo për të mos u kthyer më, por, për ti treguar qytetarit shqiptarë që nuk po e gjenë dot drejtësinë nga viti 1946, se cila është rruga e vetme!

Sistemi i Drejtësisë që krijoi Edi Rama, dje liroi vrasësin Konstandin Xhuvani, sot i hapi portën e lirisë Dritan Dajtit, nesër, ka vetëm dy rrugë, shqiptarët ose Edi Rama duhet të përfundojnë në Lanë për të mos u kthyer më. Për fat të mirë, zgjedhja është në duart e shqiptarëve…