Gjakovë, punëtorët e kompanisë “Comodita” në protestë, pagë dhe kushte më të mira pune

Shumë punëtorë të kompanisë “Comodita” në Gjakovë protestuan duke shprehur pakënaqësinë e tyre për nivelin e pagave por dhe kushtet e punës.

“Paga e ulët, kushtet dhe orari i parregullt i nxorën në rrugë për të protestuar,” shprehen ata duke dashur të ngelen anonim ndërkohë zyrtarët e kësaj kompanie konfirmuan se janë njoftuar me pakënaqësitë dhe se po i trajtojnë ato.

Ndonëse nga pamjet që u transmetuan në RTK shihet se në këtë protestë ishte një numër i konsiderueshëm i punëtorëve, asnjëri prej tyre nuk pranoi të flas para kamerës ndërkohë deklaruan se arsye e protestës ishte paga e ulët, kushtet dhe orari i parregullt.

Deri sa kreu i Sindikatës së Pavarur të Punëtorëve të Sektorit Privat, Jusuf Azemi, tha për RTK se deri më tani nuk kanë marrë asnjë ankesë, pasi kjo ndërmarrje private nuk ka sindikatë, Zyrtarët e kompanisë “Comodita” duke e konsideruar protestën normale, u shprehën se kërkesat e punëtorëve tashmë po trajtohen

“Po është e vërtetë që një numër i punëtorëve kanë dal në protestë, që unë mund ta quaj protestë paqësore, normalisht si një ndërmarrje e madhe që jemi me mbi 1500 punëtorë, normalisht që gjithmonë që mund të ketë kërkesa nga punëtorët por edhe në këtë rast edhe pakënaqësi. Ne së bashku me menaxhmentin, po të njëjtën, ditë kemi dalë dhe i kemi pranuar kërkesat e tyre me çka edhe jemi duke i trajtuar,” tha Zyrtari ligjor i kompanisë “Comodita”, Kreshnik Sheremeti.

Ndërkohë nga Inspektorati i Punës nuk janë përgjigjur nëse kanë nisur ose do të nisin ndonjë inspektim për sa u përket ankesave të ngritura nga punëtorët.

Ndryshe, edhe punëtorët e kompanisë “Comodita” që operojnë në Tiranë kanë shumë vërejtje për pagat dhe kushtet e punës, por, kundërshtuan të flasin për “PaFrikë” duke u identifikuar. Thjeshtë, u shprehën se kemi të bëjmë me një virus “Devolli” për të cilin flasin nën zë të gjithë në “Comodita”, nga roja deri te drejtori!