Gjatë shpërndarjes ushqimit, OKB: Plagosen 47 persona në Gaza, shumica nga plumbat izraelitë

Rreth 40 persona u plagosën, shumica nga zjarri izraelit, ndërsa mijëra palestinezë u përpoqën të arrinin në një qendër të re për shpërndarjen e ndihmave në Gaza, tha sot një zyrtar i lartë i OKB-së.

Kreu i zyrës së të drejtave të njeriut të OKB-së në territoret palestineze, Ajith Sunghaj, vlerësoi se 47 persona u plagosën, dhe shumica e lëndimeve ishin nga të shtënat e ushtrisë izraelite.

Mijëra palestinezë dje u dyndën në qendrën e drejtuar nga Fondacioni Humanitar i Gazës, GHF, i mbështetur nga SHBA-të, raportuan gazetarët e AFP-së, ndërsa Izraeli ngriti një sistem të ri shpërndarjeje.

Skenat kaotike në Rafah, në Rripin jugor të Gazës, erdhën disa ditë pas heqjes së pjesshme të bllokadës totale humanitare të vendosur nga Izraeli më 2 mars, duke shkaktuar mungesa të mëdha ushqimi dhe ilaçesh.

Sunghay shtoi se zyra e tij po mblidhte ende informacione rreth kaosit të ditës së kaluar. “Numri mund të rritet. Po përpiqemi të konfirmojmë se çfarë u ndodhi atyre”, duke përfshirë edhe natyrën e lëndimeve të tyre, shtoi ai.

Ushtria izraelite: Ne qëlluam të shtëna paralajmëruese

Ushtria izraelite tha se “ushtria e saj qëlloi të shtëna paralajmëruese në zonën jashtë kompleksit” dhe kishte “rivendosur kontrollin e situatës”.

Kombet e Bashkuara dhe agjencitë ndërkombëtare të ndihmës thanë se nuk do të bashkëpunojnë me GHF, e cila është akuzuar se ka punuar me Izraelin pa asnjë pjesëmarrje palestineze dhe duke anashkaluar OKB-në.

“Ne kemi shprehur shqetësim të madh për këtë mekanizëm,” tha Sunghay. “Ajo që pamë dje është një shembull shumë i qartë i rreziqeve të shpërndarjes së ushqimit në kushtet e krijuara nga Fondi Humanitar i Gazës”.