Gjenden mbetje mortore të dy personave në Rahovec dhe Prizren

Mbetjet mortore të dy personave u gjetën të premten në Kosovë, konfirmuan autoritetet. Njëri rast u gjet në varrezat e Komunës së Rahovecit, ndërsa tjetri në varrezat e Lagjes Tusuz në Prizren.

Ekipi i Institutit të Mjekësisë Ligjore tha se mbetjet mortore janë dërguar në Institutin e Mjekësisë Ligjore për analiza.

Ky ekip ka nisur mëngjesin e sotëm gërmimet në vendet e caktuara.

Valon Hyseni, doktor në Institutin e Mjekësisë Ligjore nga terreni, tha se trupat e gjetur janë varrosur nga forcat serbe, gjatë kohës së luftës në Kosovë.

Arsim Gërxhaliu, drejtor i Institutit të Mjekësisë Ligjore, tha për RFE se këto gërmime kanë nisur pas disa informacioneve dhe urdhëresës nga autoritetet e sistemit të drejtësisë.

“Këto punë po bëhen pas urdhëresës nga Prokuroria. Janë informata, të cilat vijnë dhe i përpunojmë ne, dhe normalisht që ne jemi të detyruar që t’i kontrollojmë këto terrene.”

Ndryshe, në Kosovë, ende nuk dihet për fatin e 1.643 persona, që nga vitet 1998-1999.