Gjendet pas 12 ditë kërkimesh trupi i iranianit të mbytur në rezervuar

Pas 12 ditësh kërkimesh është gjetur trupi i muxhahedinit që kishte hyrë për t’u larë në rezervuarin e fshatit Rrotull në Durrës, disa kilometra larg kampit të tyre.

Ngjarja u regjistrua më 19 qershor kur shtetasi iranian 47 vjeçar, Malek Shara’i, banues në Manëz, u fut për t’u larë në rezervuar dhe humbi jetën.

Kërkimet janë kryer nga polumbarë të Portit Durrës dhe efektivë të Policisë Durrës.

Kërkimet kanë vijuar për rreth 12 ditë për gjetjen e trupit, por sot, pas 4 orë kërkimesh, trupi i tij është konstatuar në thellësi të rezervuarit. Pasi u nxor në sipërfaqe u pa se trupi i tij ishte pjesërisht i dekompozuar nga qëndrimi për një kohë të gjatë në ujë.

Trupi i pajetë është dërguar për egzaminim në morgun e spitalit të Durrësit.