Gjendet trupi i pajetë edhe i një terroristi serb në veri
Prokuroria e Kosovës ka konfirmuar sot se e ka gjetur trupin e pajetë të edhe një sulmuesi të dyshuar në veri të vendit, duke e çuar në katër numrin e terroristëve të vrarë.
Trupi i pajetë është gjetur rreth 1.5 kilometra larg vendit të incidentit, një ditë pasi një grup prej dhjetëra personave të armatosur e sulmuan Policinë e Kosovës. Lajmi u konfirmua për RFE nga prokurori Naim Abazi.
“Jemi duke bërë përpjekje ta identifikojmë atë për momentin, pasi nuk kishte dokumente identifikimi me vete,” tha Abazi duke shtuar se, gjithashtu, në vendin e ngjarjes është gjetur edhe një automjet tjetër me armatim.
Policia e Kosovës u sulmua nga persona të maskuar në orët e hershme të së dielës pasi shkoi për t’i larguar barrikadat e vendosura në Banjskë, të cilët u strehuan në manastirin e fshatit më vonë.
Si pasojë, zyrtari i Policisë së Kosovës, Afrim Bunjaku, u vra dhe disa të tjerë u plagosën.
Dje, autoritetet kosovare thanë se tre sulmues u vranë gjatë sulmit, ndërsa gjashtë persona, që dyshohet se ishin në kontakt me ta, u arrestuan.
Kryeministri i Kosovës, Albin Kurti, tha dje se një formacion terrorist dhe kriminal prej 30 vetave mori pjesë në sulm.
Sot, gjendja në veri të Kosovës është e qetë, por qasja për në fshatin Banjskë në Komunën e Zveçanit është ende e mbyllur nga policia e Kosovës, pas sulmit vdekjeprurës të së dielës nga persona të armatosur dhe maskuar.
Njësia Speciale e Kosovës e ka vendosur një automjet të blinduar dhe vetura të tjera në kryqëzimin Ballaban, i cili dërgon në Banjskë.
Duke folur në një konferencë për gazetarë, Kurti i përshkroi sulmuesit e armatosur si një njësi e organizuar profesionale, që ka ardhur për të luftuar në Kosovë.
Ai i bëri thirrje grupit që t’iu dorëzohet autoriteteve kosovare.
Presidenti i Serbisë, Aleksandar Vuçiç, tha se personat e armatosur ishin serbë lokalë të Kosovës, të cilët nuk mund të vuanin më terrorin e Kurtit. Ai, raporton RFE, dënoi vrasjen e policit të Kosovës, por mohoi se Beogradi kishte ndonjë lidhje me sulmin.
