Gjendja e jashtëzakonshme në Serbi përfundon më 7 maj

Presidenti i Serbisë, Aleksandar Vuçiç tha se gjendja e jashtëzakonshme në Serbi pritet të hiqet më 7 maj.

Duek folur për TV Pink, ai tha se së bashku me kryeministren serbe, Ana Bërnabiç do të marrin një vlerësim për këtë çështje nga ministria e Mbrojtjes, pasi ashtu e kërkojnë procedurat.

“Pastaj vjen vendimi i Qeverisë së Serbisë, dhe me nënshkrimin tim dhe kryeministres Bërnabiç, ne e dërgojmë çështjen në Parlament,” tha Vuçiç duke shtuar se dy kushtet për heqjen e gjendjes së jashtëzakonshme janë përmbushur.

“Njëri kusht është ulja nën pesë për qind e personave pozitiv me COVID-19 për shtatë ditë rresht dhe tjetri – dukshëm më pak njerëz në respirator,” tha Vuçiç.

Serbia e kishte vendosur gjendjen e jashtëzakonshme më 16 mars.

Epidemiologu, Predrag Kon, tha se pasi të hiqet gjendja e jashtëzakonshme, do të ishte përgjegjësia e njerëzve që të parandalojnë përhapjen e koronavirusit.

Në Serbi gjatë 24 orëve të fundit, raporton RFE, 4 persona kanë humbur jetën si pasojë e koronavirusit, duke rritur numrin e përgjithshëm të viktimave në 193, njoftoi Shtabi i Krizës i formuar nga qeveria serbe.

Autoritetet shëndetësore kanë testuar 5.274 individë, 102 prej të cilëve kanë dalë pozitiv në COVID-19.

Sipas zyrtarëve, shkalla e vdekshmërisë është 2.04 për qind.

Në Serbi deri më tani janë regjistruar 9.464 raste me COVID-19.