Gjendja e Kombit, Presidenti Trump: Kjo është epoka e artë e Amerikës!

Në fjalimin e përvitshëm mbi Gjendjen e Kombit përpara Kongresit, Presidenti i Shteteve të Bashkuara, Donald Trump, për 1 orë e 47 minuta foli për rikthimin e kombit amerikan më fuqishëm se kurrë dhe për epokën siç tha ai të artë të Amerikës.

“Kombi ynë është rikthyer – më i madh, më i mirë, më i pasur dhe më i fortë se kurrë më parë,” e filloi fjalimin e tij Presidenti amerikan. “Kjo është epoka e artë e Amerikës,” vazhdoi republikani në një fjalim në të cilin vlerësoi ato që i konsideronte arritje të administratës së tij, nga indekset rekord të aksioneve, çmimet e ulëta të karburantit, deri te parandalimi i hyrjes së fentanilit në territorin e SHBA-së.

Presidenti Trump konmfirmoi se sot Shtetet e Bashkuara respektohen ndoshta si kurrë më parë në botë dhe se po fitojnë aq shumë sa nuk dinë më se çfarë të bëjnë në lidhje me të.

Kështu, orën e parë të fjalimit të tij ai ia kushtoi ekonomisë.

Tha se trashëgoi një komb në krizë, një ekonomi të ndenjur me inflacion të lartë, një vend me kufij të hapur dhe luftëra e kaos në të gjithë botën nga Ish-Presidenti Joe Biden.

Trump theksoi se ka ulur inflacionin, ka sjellë tregjet e aksioneve në nivele rekord, ka prezantuar ulje të rëndësishme të taksave dhe ka ulur çmimet e barnave. Presidenti republikan beson se ky është një transformim si askush nuk e ka parë më parë dhe se SHBA-të tani respektohen në botë si ndoshta kurrë më parë”.

Republikanët në Kongres ndoqën vërejtjet e Trump duke u ngritur në këmbë dhe duke duartrokitur, dhe e bënë këtë më shumë se njëqind herë gjatë fjalimit të gjatë.

Me këtë rast Preisdneti Trump komentoi faktin se demokratët nuk po ngriheshin në këmbë.

“Asnjëri prej tyre nuk po ngrihet në këmbë. Këta njerëz janë të çmendur. Po ju them, janë të çmendur.” Ai akuzoi përsëri demokratët për mashtrim zgjedhor, duke theksuar se “ky duhej të ishte mandati i tij i tretë, por po ndodhin gjëra të çuditshme”.

Të ftuar në Kongres
Megjithatë, rivalët politikë të Trump u ngritën në këmbë ndonjëherë, për shembull kur ai foli në nder të zjarrfikësve amerikanë ose, në kontekstin e Charlie Kirk, theksoi se nuk ka vend për dhunë politike në Amerikë.

Duke folur për aktivistin konservator të vrarë, presidenti amerikan tha se ai kishte kontribuar në “rritjen e madhe të Krishterimit” në Shtetet e Bashkuara. “Ne e duam fenë dhe na pëlqen ta rikthejmë atë”, tha ai para Kongresit, ku ishte ulur edhe e veja e Kirk, Erica Kirk.

Trump gjithashtu priti disa veteranë ushtarakë, ekipin amerikan të hokejit që u kthye nga Lojërat Olimpike me medalje ari, dhe nënën e Irina Zarutska, një refugjate 23-vjeçare nga Ukraina që u vra në një tren në Charlotte, në shtëpinë e demokracisë amerikane.

Baste të mëdha
Fjalimi vjetor në Kongres ishte një çështje me baste të mëdha për Trump, i cili po përballet me një rënie të popullaritetit të tij, shqetësime për një luftë të mundshme me Iranin dhe pasojat nga publikimi i dokumenteve qeveritare të lidhura me shkelësin e dënuar seksual Jeffrey Epstein, ish-mikun e tij, i cili përmend edhe bashkëpunëtorët e tij si Howard Lutnick, Sekretari aktual i Thesarit.

Që në fillim të fjalimit, Trump tregoi disiplinë të pazakontë, duke iu përmbajtur kryesisht tekstit të tij të përgatitur dhe duke shmangur devijimet e zakonshme, raporton Agjencia e lajmeve Reuters. Natyra e tij luftarake shpejt doli në pah gjatë një diskutimi mbi masat më të rrepta kundër imigracionit, gjë që çoi në një shkëmbim fyerjesh me disa ligjvënës demokratë.

Ndërkohë Agjencia e lajmeve France Presse raporton se Presidenti Trump foli para Kongresit për një orë rekord e 47 minuta, duke tejkaluar kohën 1:20 të demokratit Bill Clinton në vitin 2000

Përmbajtje ndaj tarifave
Megjithatë, Trump ishte i rezervuar në lidhje me Gjykatën Supreme që rrëzoi regjimin e tij kryesor tarifor të premten. Ndryshe nga paraqitjet e mëparshme në të cilat ai personalisht fyeu gjyqtarët, presidenti shtrëngoi duart me katër gjyqtarët e pranishëm kur hyri në sallën e gjyqit, duke e quajtur shkurtimisht vendimin “të pafat” dhe duke njoftuar se do të rikthente tarifat përmes një rruge tjetër.

Edhe pse ia ka kushtuar pjesën më të madhe të mandatit të tij politikës së jashtme, tema mori pak vëmendje në 90 minutat e para të fjalimit të tij. Trump përsëriti pretendimin e tij se kishte “përfunduar” tetë luftëra dhe mezi përmendi luftërat në Rusi dhe Ukrainë, pavarësisht se të martën shënoi përvjetorin e katërt të pushtimit rus.

Ai gjithashtu nuk ofroi plane të qarta për Iranin, mes shqetësimeve në rritje se Shtetet e Bashkuara po i afrohen konfliktit ushtarak me Teheranin.

“Dua ta zgjidh këtë çështje diplomatikisht”, tha ai. “Por një gjë është e sigurt: Nuk do të lejoj kurrë që shteti kryesor sponsorizues i terrorizmit në botë të ketë armë bërthamore.”