Gjenerali pa nam dhe nishan!
nga Agim Popoci
Nami i vetëm që kishte si Gjeneral, dhe atë fal Malos, ishte kur atdheut i duhej një President; Dhe, namin e personit inteligjent që i dha shkrimtari i njohur shqiptar, e humbi vetë. Hoqi dorë nga grada madhore për ti shërbyer atdheut, për të marrë një post ministror që ti shërbej Edi Ramës!
Në analet e ushtrisë, një rast i tillë, normal nuk ka ndodhë më parë, por kishte nga ata dashamirës të Sandër Lleshajt që mendonin se duhet i japim kohë Ministrit të Brendshëm, që ta tregoj veten.
Por Sandër Lleshaj përveç se mbeti pa nam, rezultoi se nuk ka as nishan. Një oficer i ashpër ndaj armikut, vetëm në vijën e frontit arsyetohet, madje kjo ashpërsi në kufijtë e konventave ndërkombëtare. Por çfarë na del ky Gjenerali i Malos që u propozua për President, përveç se pa nam?!
Përdorimi i gazit lotsjellës në protesta e opozitës, me ndihmën e mediave në shërbim të Edi Ramës u relativizuan. Kur ai arriti deri tek 9-katëshet dhe qytetarët që kaluan andej edhe kishin pasur vështirësi në frymëmarrje, u quajt i dëmshëm për ambientin, dhe nuk e çau kokën njeri për opozitën që protestonte para Parlamentit dhe Kryeministrisë. Por kur u përdor tek Bregu i Lumit, për të nxjerrë familjarët që refuzonin shembjen e shtëpive të tyre pa u dëmshpërblyer, në mënyrë që të vazhdoj projekti “Bulevardi I Ri”, dajaku dhe gaz sjellësi që urdhëronte tashmë Ish-Gjeneral Sandër Lleshaj, filloi të diskutohet.
Nuk kaluan as 24 orë dhe debatin mbi arsyeshmërinë e dajakut dhe gazit lotsjellës në emër të rendit dhe qetësisë publike, e mbylli vetë Ish-Gjeneral Lleshaj.
Pas dështimit në Aeroportin e Rinasit, ku u grabitën miliona euro në vendin ku ishte rritur gatishmëria e policisë për shkak të vizitës së Zv/Nd.Seketarit amerikan të Shtetit, Matthew Palmer, në Tiranë, më e pakta që pritej ishte dorëheqja e Ministrit të Brendshëm dhe kërkim falja pas turpërimit që i bëri shtetit shqiptar. Dhe, ndërsa të gjitha mediat ndërkombëtare po merreshin me detajet e grabitjes së armatosur në pistën e aeroportit, madje ato greke pas orë pas grabitjes dhanë edhe emrin e atij që ishte vrarë, dhe opinioni shqiptar ishte në pritje të dorëheqjes së tij, Ish-Gjeneral Sandër Lleshaj doli dhe pa pikë turpi akuzoi koncesionarin e aeroportit TIA. Dhe jo vetëm kaq!
Gjenerali pa nam, pasi u zhdukën disa miliona euro, doli e i tha opinionit publik se nuk kanë funksionuar aspak mekanizmat e sigurisë që janë nën përgjegjësinë e kompanisë kineze që ka koncesionin e Aeroportit të Rinasit; Nuk ka arritur të zbatojë standardet e detyrueshme të sigurisë, që përcaktohen nga legjislacioni vendas dhe nga Organizata Botërore e Aviacionit Civil, ICAO; Foli dhe për parametrin e jashtëm të sigurisë i cili dje jo vetëm që është hapur për disa sekonda, por, për më keq, Koncesionari dhe Kontraktori i tij për sigurinë nuk kanë arritur madje as të sinjalizojnë policinë për këtë thyerje të patolerueshme të sigurisë. Dhe ndërsa nuk dha asnjë përgjigje nga ajo që kishte ndodhur në pistën e Aeroportit të Rinasit, që pretendohet se duhet të jetë vendi më i sigurtë në vend, Ish-Gjeneral Sandër Lleshaj me gojën e vetë, i ra kokës së vetë duke thënë:
“Koncesionari jo vetëm që ka refuzuar zbatimin e kërkesave të shumta dhe të herëpashershme të Policisë së Shtetit për marrjen e masave në drejtim të sigurisë fizike, por në shumë raste as nuk ka denjuar të kthejë qoftë edhe përgjigjet formale për korrespondencën përsëritur zyrtare.”
Po këtu flenë lepuri, dhe Gjenerali pa nam siç është tashmë e qartë, nuk ka as nishan. Nëse një grua që me mund e ndërtoi shtëpinë tek Bregu i Lumit dhe refuzoi të dal nga shtëpia e saj, Sandër Lleshaj urdhëroi gjuajtjen e gazit lotsjellës në shtëpi, nëse është nevoja edhe përdorimin e dhunës, për neutralizimin e saj. Dhe e gjitha kjo, sipas tij, u bë në emër të Ligjit.
Meqë edhe koncesionari refuzoi zbatimin e kërkesave të shumta dhe të herëpashershme të Policisë së Shtetit, pse Ish-Gjeneral Sandër Lleshaj nuk urdhëroi gjuajtjen e gazit lotsjellës në Zyrat e, siç e thotë ai, kinezëve, në mënyrë që të mos na ndodhë hataja në tokën shqiptare.
Sot, Ish-Gjeneral Sandër Lleshaj nuk e sheh të arsyeshme të jap dorëheqje por parametrat e tragjedisë së mundshme me avionin e “Austrian Airlines” me udhëtarë, mund ti kuptoj vetëm nga reagimi i frikshëm i kësaj kompanie ajrore pas grabitjes. Kompania nuk është se nuk do lekë dhe heqë dorë kot nga transferta e parave në të ardhmen, sepse përkthyer në para janë shumë para, por ajo nuk do viktima. Rreth 200 udhëtarë në avion, në dorën e një krimineli, është dëm shumë më i madh se sa disa miliona euro. Dhe kur e gjitha kjo ndodhë për shkak të një ministri të Brendshëm të paaftë, i cili jo vetëm që nuk e arreston një person shumë të rrezikshëm që është në kërkim ndërkombëtar por e lë të futet në pistën e Aeroportit të vetëm në vend, tragjedia bëhet edhe më e madhe.
Pas grabitjes së armatosur, vrasjen e njërit prej grabitësve, Ish-Gjeneral Sandër Lleshaj e konsideron “goditje shkatërruese”, madje edhe “shkatërrim të këtij grupi shumë të rrezikshëm kriminal” por nuk sqaroi se si mund të goditet një person dhe jo furgoni plotë me para që arriti të largohet në drejtim të paditur. Dhe në fund, nëse Ish-Gjeneral Sandër Lleshaj nuk e sheh të arsyeshme të jap dorëheqje sepse konsideron se ky nuk është dështim i Ministrisë së Brendshme, pse sigurinë e Aeroportit të Rinasit e mori përsipër Ministria e Mbrojtjes?! Apo kot për ti bërë qejfin shefit, siç bëri me gradën e gjeneralit…
