Gjenerali Wesley Clark konfirmohet si dëshmitar i mbrojtjes së Hashim Thaçit

Ish-Komandanti i NATO, gjenerali Wesley Clark, është konfirmuar si dëshmitar i mbrojtjes së Ish-Presidentit të Kosovës, Hashim Thaçit, në Gjykatën Speciale në Hagë.

Gjenerali Clak që udhëhoqi për 78 ditë fushatën e bombardimeve kundër forcave të Ish-Jugosllavisë është konfirmuar zyrtarisht se do të jetë dëshmitar. Sipas dokumenteve zyrtare, mbrojtja e Thaçit ka kërkuar që dëshmia e gjeneralit amerikan të fillojë më 19 nëntor.

“Në përputhje me Urdhrin e Panelit Gjyqësor të datës 2 shtator 2025, Mbrojtja për z. Hashim Thaçi (“Mbrojtja”) njofton se është marrë autorizimi nga qeveria e Shteteve të Bashkuara (“Ofruesi sipas Rregullës 107”), duke autorizuar deklaratën dhe dëshminë e dëshmitarit të fundit të saj, 1DW-007, gjeneralit Wesley Clark”, thuhet në dokument.