Gjeneralmajor Ferenc Kajari, Komandant i ri i KFOR-it

Gjeneralmajor Ferenc Kajari është Komandant i ri i KFOR-it.

Në ceremoninë e ndërrimit të komandës kryesuar nga Komandanti i Forcave të Përbashkëta Aleate në Napoli, Admirali Robert P. Burke, Gjeneralmajori i Ushtrisë Italiane, Franco Federici, ia ka dorëzuar Komandën e KFOR -it, Gjeneralmajorit të Ushtrisë Hungareze, Ferenc Kajari.

Kajari për median hungareze “MTI” është shprehur se ai do të jetë komandant i trupave të 27 vendeve që sigurojnë personelin e KFOR-it.

Hungaria gjithashtu do të dërgojë këshilltarin politik të komandantit dhe shefin e departamentit të këshillimit ligjor, si dhe disa oficerë të tjerë kryesorë që do të mbajnë poste kyçe në KFOR, sipas Kajarit.

Ai gjithashtu njoftoi se Forcat e Armatosura Hungareze kishin një sistem të vendosur për trajnimin e personelit.

Komandanti tha se situata e sigurisë në Ballkan është aktualisht e qëndrueshme, por e brishtë.