Gjermani, aktiv mbi 1000 mafiozë italianë! Anëtarë të Ndrangheta, Cosa Nostra…

Në Gjermani aktualisht janë aktiv mbi 1000 pjesëtarë të disa organizatave italiane të krimit të organizuar, ka bërë të ditur sot ministria gjermane e Punëve të Brendshme.

“Bazuar në të dhënat e ministrisë federale dhe krahinore të Punëve të Brendshme kemi ardhur në përfundimin se në Gjermani aktualisht jetojnë 1.003 pjesëtarë aktiv të disa prej organizatave të krimit të organizuar,” thuhet në përgjigjen e ministrisë së Punëve të Brendshme drejtuar grupit parlamentar të Gjelbërve në Bundestag.

Prej 1.003 pjesëtarëve të mafias italiane në Gjermani, 519 i takojnë asaj kalabrineze Ndrangheta, 134 sicilianes Cosa Nostra dhe 118 asaj të Napolit, Camorra.

Përveç këtyre grupimeve të njohura, në Gjermani janë aktivë edhe 33 pjesëtarë të grupacionit sicilian Stidde, 37 të organizatës kriminale nga krahina Apuli, derisa theksohet se janë 162 pjesëtarë të mafias që nuk përcaktohen dot se cilit nëngrup i takojnë.

Ministria e Punëve të Brendshme e Gjermanisë thekson se përveç trafikut të drogës, mafia është aktive në gastronomi, tregtinë e produkteve ushqimore, automjeteve, ndërsa veprat penale kanë të bëjnë me evazion fiskal dhe pastrimin e parave.