Gjermani, Shqipëria sërish vend me rrezik të lartë nga koronavirusi
Ministria e Jashtme gjermane e vendosi sërish Shqipërinë në listën e zonave me rrezik të lartë të koronavirusit, kjo pasi Instituti Robert Koch e kategorizoi Shqipërinë si vend me rrezik të lartë të premten, për shkak të numrit të lartë në rritje të infektimeve.
Në këtë listë rifuten edhe Serbia, Sri Lanka, Azerbajxhani dhe Japonia. Ky kategorizim ka pasoja për udhëtarët që kthehen nga pushimet.
Udhëtarët e pavaksinuar apo ata që nuk e kanë kaluar infeksionin me koronavirus dhe kthehen nga zonat me rrezik të lartë të virusit, duhet për 10 ditë të futen në karantinë, edhe nëse paraqesin një test negativ të koronavirusit. Vetëm pas ditës së pestë të karantinës, ajo mund të ndërpritet pas një testi negativ. Edhe fëmijët duhet të futen në karantinë. Kurse fëmijët nën 12 vjeç nuk kanë nevojë të bëjnë test të ri pas pesë ditësh karantinë, ajo mbaron për ata automatikisht pas ditës së pestë, raporton DW duke shtuar se të vaksinuarit dhe të shëruarit mund të mënjanojnë karantinën, nëse paraqesin një dokument të vaksinimit apo shërimit nga koronavirusi.
Përveç karantinës të kthyerit në Gjermani nga zonat e rrezikut duhet të plotësojnë më parë edhe një formular digjital https://www.einreiseanmeldung.de.
Të testuarit, të vaksinuarit plotësisht dhe të shëruarit duhet të ngarkojnë në këtë portal edhe dokumentin që vërteton vaksinimin, shërimin nga koronavirusi apo rezultatin e testimit.
Ndryshe, Instituti gjerman Robert Koch aktualizon rregullisht të dhënat në bazë të zhvillimit të pandemisë, në bazë të cilave Ministria e Jashtme e Gjermanisë e vendos ose e heq një vend nga lista e vendeve të rrezikuara.
