Gjermania kritikon Kosovën për mosratifikim të marrëveshjeve ndërkombëtare

Mosmiratimi i projektligjeve për ratifikimin e pesë marrëveshjeve ndërkombëtare, për të cilat kanë arritur pajtueshmëri autoritetet e Kosovës, ka nxitur reagimin e ambasadorit të Gjermanisë në Prishtinë, Christian Heldt.

Parlamenti i Kosovës, në seancën e mbajtur më 11 qershor, ka dështuar të miratojë një sërë marrëveshjesh ndërkombëtare financiare që Qeveria e Kosovës ka nënshkruar me mekanizmat ndërkombëtarë. Për këtë dështim, Ambasadori i Gjermanisë në Prishtinë, Christian Heldt ka kritikuar Parlamentin e Kosovës.

“Fjala zhgënjim është shumë diplomatike. A do ta shohim së shpejti Parlamentin e Kosovës duke punuar? Kjo kishte të bënte me paketat e ndihmës për shtetin dhe popullin,”thekson Ambasadori Heldt në reagimin e tij përmes rrjetit social, Twitter.

Ai ka bërë këto komente, ndërkohë që edhe shefja e Zyrës së BE-së në Prishtinë, Nataliya Apostolova, është shprehur “e zhgënjyer” që kuvendi nuk ka miratuar këto legjislacione.

Marrëveshjet ndërkombëtare, përfshirë këtu edhe marrjen përsipër të detyrimeve financiare nga ana e Kosovës, sipas Kushtetutës duhet të ratifikohen në Parlament me dy të tretat e votave të të gjithë deputetëve.

Sipas të dhënave të Ministrisë së Financave, raporton RFE, totali i marrëveshjeve të cilat duhet ratifikuar në procedurë të përshpejtuar përfshin pesë marrëveshje kredie në vlerë 228.1 milionë euro dhe dy marrëveshje bashkëfinancimi në vlerë 61 milionë eurove.