Gjermania kundër shkëmbimit të territoreve, mbështet Kosovën në Interpol
Ambasadori i gjerman në Serbi, Thomas Schieb, deklaroi sot në Beograd se Gjermania është kundër shkëmbimit të territoreve midis Serbisë e Kosovës, ndërsa përkrah anëtarësimin e Kosovës në Interpol.
“Anëtarësimi i Kosovës në Interpol mund t’i kontribuojë luftës kundër krimit,” tha ambasadori Schieb duke shtuar: “Pohohet se kjo mund të zgjidhet përmes UNMIK-ut, por ajo zgjat më shumë se po të jetë Policia e Kosovës anëtare e Interpolit,” raporton televizioni serb TV N1.
Siç ka sqaruar ai, anëtarësim në Interpol kërkon Policia e Kosovës dhe jo Kosova.
Për anëtarësim ose jo të Kosovës në Interpol do të votohet në Asamblenë e Përgjithshme të Interpolit, që do të mbahet nga data 18 deri më 21 nëntor në Emiratet e Bashkuara Arabe.
Por, siç ka thënë ambasadori Thomas Schieb, Gjermania është kundër shkëmbimit të territoreve midis Serbisë e Kosovës dhe se këtë qëndrim e kanë edhe shumica e vendeve të BE-së dhe ato të rajonit.
“Vetë kancelarja Angela Merkel e ka përsëritur disa herë këtë qëndrim dhe ai vazhdon të mbetet. E di se ka pasur spekulime se ndoshta Gjermania e ka ndryshuar mendimin, por qëndrimi gjerman mbetet ashtu si më parë,” tha ambasadori gjerman.
Me këtë rast Ambasadori Thomas Schieb sqaroi se Gjermania druan që shkëmbimi i territoreve mund të ketë implikime në rajon, se ndoshta do t’i ndihmonte zgjidhjes së problemit të Kosovës, por do të nxiste probleme në pjesë të tjera të rajonit, që nuk mund të parashikohen, raporton KTV duke ju referuar mediave në Serbi.
Schieb tha se nuk është e saktë që “përmes shkëmbimit të një pjese të vogël të territorit zgjidhet nyja e Kosovës” dhe shtoi se janë një varg çështjesh, si mbrojtja e pakica, mbrojtja e trashëgimisë kishtare dhe shumë çështje të tjera, ndërsa ridefinimi i kufirit vetëm zhvendos vëmendjen prej tyre.
Në lidhje me konstatimet se komisioneri për zgjerim pranë BE, Johannes Hahn dhe Washingtoni do të mbështesnin çfarëdo marrëveshjeje që arrijnë Beogradi e Prishtina, Thomas Schieb tha se ata nuk kanë thënë se mbështesin shkëmbimin e territoreve.
