Gjermania ndalon tubimet e partive kosovare për zgjedhjet e 28 dhjetorit

Ambasada e Gjermanisë në Prishtinë ka informuar kandidatët nga Kosova që mendojnë të zhvillojnë fushatë zgjedhore në territorin gjerman se këtë e kanë të pamundur për shkak të disa rregullave që duhet të respektohen.

Ambasada përmes një postimi në rrjetin social Facebook, thekson se, si rregull, organizimi i ngjarjeve të fushatës zgjedhore nga zyrtarë të huaj në Gjermani nuk lejohet brenda periudhës prej tre muajsh para mbajtjes së zgjedhjeve.

“Meqë kemi një diasporë të madhe të Kosovës në Gjermani, dëshirojmë t’i rikujtojmë të gjithë kandidatët se, si rregull, ngjarjet e fushatës zgjedhore nga zyrtarët e huaj në Gjermani nuk lejohen në periudhën më pak se 3 muaj para zgjedhjeve. Faleminderit për mirëkuptimin,” thuhet në njoftimin e Ambasadës.

Ky paralajmërim vjen në prag të zgjedhjeve të jashtëzakonshme për Parlamentin e Kosovës, të cilat pritet të mbahen më 28 dhjetor 2025.