Gjermania ndërpret pjesërisht eksportin e armëve në Izrael
Kancelari i Gjermanisë, Friedrich Merz, deklaroi një ndërprerje të furnizimit të armatimeve, që mund të përdoren nga Izraeli në Rripin e Gazës.
Në sfondin e zhvillimeve në Rripin e Gazës qeveria federale e Gjermanisë vendosi ndërprerjen pjesërisht të eksportit të armatimeve ndaj Izraelit. Gjermania “përkohësisht nuk do të miratojë furnizimin me armatime, që mund të përdoren në Rripin e Gazës”, deklaroi sot kancelari kristiandemokrat Friedrich Merz në Berlin. Këtë vendim ai e argumentoi me vendimet e natës së kaluar “të marra ka kabineti izraelit, për një ndërhyrje edhe më të ashpër të ushtrisë izraelite në Rripin e Gazës”.
Kabineti i Siugurisë në Izrael natën duke gdhirë dita e sotme miratoi një plan të paraqitur nga kryeministri Benjamin Netanjahu për mposhtjen e organizatës terroriste Hamas në Rripin e Gazës. Ky plan parashikon, që ushtria e Izraelit të kontrollojë qytetin e Gazës, sikurse njoftoi kabineti i Netanjahut. Njëkohësisht duhet të furnizohet popullsia civile me ndihma jashtë zonave të luftimeve.
Qeveria gjermane “thellësisht e shqetësuar”
“Izraeli ka të drejtë, të mbrohet ndaj terrorit të Hamasit”, deklaroi kancelari Merz. “Lirimi i pengjeve dhe bisedimet serioze për një armëpushim kanë për ne prioritetin më të lartë.” Çarmatimi i Hamasit është i domosdoshëm. “Hamasi në të ardhmen nuk duhet të ketë asnjë rol në Gazë.” Vendimi për veprimet ushtarake “nga këndvështrimi i qeverisë federale nuk le të kuptohet, se si duhet të arrihen këto objektiva”, deklaroi kancelari.
Qeveria gjermane është thellësisht e shqetësuar “për vuajtjet e vazhdueshme të popullsisë civile në Rripin e Gazës”, theksoi Merz. “Me ofensivën e planifikuar qeveria e Izraelit mban përgjegjësi më shumë se deri më sot për furnizimin e saj. Popullsisë civile duhet t’i mundësohet akses i zgjeruar në furnizimet me ndihma, e po ashtu edhe organizatave të OKB-së dhe të tjera institucioneve jo shtetërore.”
Izraeli “pas hapave të duhura të ndërmarra ditët e fundit për gjendjen humanitare në Gazë duhet të vazhdojë përpjekjet për përmirësimin e qendrueshëm të saj”, vazhdoi kancelari. Ai i kërkoi gjithashtu qeverisë izraelite që “të mos ndërmarrë hapa të mëtejshme drejt aneksimit (pushtimit) të Bregut Perëndimor”./DW/
