Gjermania refuzon sërish thirrjet për të dërguar aeroplanë luftarakë në Ukrainë

Qeveria e Gjermanisë ka refuzuar sërish thirrjet për dërgim të avionëve ushtarakë në Ukrainë, pasi lideri i opozitës Friedrich Merz, prej Unionit Demokristian të qendrës së djathtë, tha se mbështet idenë.

Zëdhënësi i Qeverisë gjermane, Steffen Hebestreit, tha se Ukraina do të pranojë disa avionë luftarakë F-16 prej partnerëve perëndimorë, të cilët Gjermania nuk i posedon, raporton RFE.

“Nuk ka kuptim që të dërgohen lloje të ndryshme të avionëve luftarakë në Ukrainë,” tha Hebestreit duke shtuar:

“Ndonëse avionët luftarakë mund të duken të ngjashëm prej jashtë, ata janë shumë të ndryshëm për t’i menaxhuar. Duhen trajnime afatgjata për ta.”

Friedrich Merz ka kërkuar dje ndihmë shtesë për Ukrainën, në një intervistë të realizuar me transmetuesin gjerman, ARD.

“Më duket disi e besueshme që t’i ndihmojmë Ukrainës që të rifitojë kontrollin e hapësirës së vet ajrore. Sepse, këto sulme me raketa, që janë secilën herë e në rritje, kundër infrastrukturës, kundër elektricitetit dhe furnizimeve me ujë, kundër spitaleve, kundër shtëpive të kujdesit, nuk mund të zmbrapsen vetëm prej tokës,” tha Merz.

“Prandaj është konfirmuar dërgimi i avionëve luftarakë në Ukrainë, prej shumë vendeve, përfshirë disa në Evropë. Ne si evropianë, nuk duhet të qëndrojmë mbrapa”.

Hebestreit tha sot se propozimi i Merzit nuk është i ri, dhe që Merz duhet të ketë njohuri që Gjermania nuk mund të dërgojë avionë të njëjtë në Ukrainë.

Lufta në Ukrainë ka nisur më 24 shkurt të vitit 2022, raporton RFE. Presidenti rus, Vladimir Putin e quan luftën “operacion special ushtarak” për të çmilitarizuar Ukrainën. Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra. Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.