Gjermania tregon përse e mbështetë Kosovën për antarësim në KE

Vetëm disa javë pas vizitës së saj në rajon, ministrja e Punëve të Jashtme të Gjermanisë deklaron se tashmë e ka të qartë se rritja e bashkëpunimit me këto shtete është vendimtare. Me këtë rast, Annalena Baerbock përmend edhe Kosovën dhe arsyen përse Gjermania e mbështetë shtetin e ri të antarësohet në Këshillin e Evropës.

“Vizita ime e fundit në vendet e Ballkanit Perëndimor më bëri të qartë se sa vendimtare është intensifikimi i bashkëpunimit tonë me këto shtete në këtë moment vendimtar. Kjo është arsyeja pse ne mbështesim dëshirën e Kosovës për t’iu bashkuar familjes së shteteve anëtare të Këshillit të Europës,” tha Baerbock përmes rrjetit social Twitter.

Por jo vetëm Gjermania. 

Përkrahje për anëtarësimin e Kosovës në Këshill të Europës dje në mbledhjen e Komitetit kanë shprehur edhe Shqipëria e Kroacia.

Për këto mbështetje, Ministria e Jashtme e Kosovës doli me një deklaratë për t’i falënderuar dhe për të argumentuar se pse Kosova duhet të jetë pjesë e organizatës për të drejtat e njeriut.

Ndërkohë dje në Torino është shënuar edhe fundi i presidencës italiane me KiE, dhe tashmë Irlanda do të kryesojë presidencën e Këshillit të Evropës.

Kryediplomatja kosovare, Donika Gërvalla, e cila edhe ka dorëzuar ditë më parë aplikacionin për anëtarësim, ka uruar menjëherë Irlandën për marrjen e kryesimit të presidencës me Këshillin e Evropës, derisa u shpreh se mezi pret të vazhdojë bisedimet rreth anëtarësimit të Kosovës në KiE./RTK/