Gjithçka gati për fillimin e Samitit të Procesit të Berlinit në Londër

Të mërkurën, 22 Tetor 2025, në Londër, Qeveria e Mbretërisë së Bashkuar do të jetë mikpritëse e Samitit të radhës të Procesit të Berlinit që organizohet me vendet e Ballkanit Perëndimor.

“Qëllimi i Samitit është të rrisë bashkëpunimin rajonal, të mbështesë zhvillimin ekonomik dhe të përshpejtojë përpjekjet për përafrim më të ngushtë me Evropën në Ballkanin Perëndimor” theksohet në njoftimin e Qeverisë së Mbretërisë së Bashkuar, lidhur me samitin e 22 tetorit.

 “Qeveria e Mbretërisë së Bashkuar do të punojë me Gjermaninë – si nismëtare e Procesit të Berlinit – për prioritetet e përbashkëta në Ballkanin Perëndimor” thuhet mes tjerash në njoftim, duke theksuar se “qëllimet e saj janë forcimi i sigurisë evropiane, duke mbështetur aleatët e cenueshëm të NATO-s dhe duke kundërshtuar ndikimet armiqësore dhe faktorët e paqëndrueshmërisë, si dhe duke adresuar kërcënimet e përbashkëta nga migrimi i parregullt, krimi i organizuar i rëndë dhe financat e paligjshme”.

“Një synim tjetër është promovimi i rritjes ekonomike me qëllim heqjen e barrierave për tregtinë dhe investimet përmes bashkëpunimit të përforcuar rajonal duke mbështetur përafrimin me Evropën”, theksohet aty teksa shtohet se Qeveria britanike gjithashtu “synon forcimin e bashkëpunimit të Mbretërisë së Bashkuar me partnerët rajonalë, përfshirë zbatimin e Procesit të Berlinit dhe për këtë qëllim ka emëruar Karen Pierce të dërguar special të  Mbretërisë së Bashkuar për Ballkanin Perëndimor”.

Lidhur me samitin e të mërkurës, është deklaruar edhe Qeveria gjermane në Berlin:

 “Të mërkurën, më 22 tetor, kancelari federal Friedrich Merz do të marrë pjesë në samitin e Procesit të Berlinit të krerëve të shteteve dhe qeverive, që do të mbahet në Londër, në Lancaster House”, theksohet në deklaratën e Qeverisë gjermane.

“Proces i Berlinit është një histori suksesi, të cilën po e vazhdon edhe qeveria federale nën drejtimin e kancelarit Merz. Me këtë, qeveria gjermane nënvizon angazhimin e saj për Ballkanin Perëndimor si një rajon me rëndësi strategjike në Evropë”, nënvizohet në njoftim.

“Ky është një format vendimtar për bashkëpunimin rajonal dhe për procesin e integrimit në BE.  Pjesë e këtij formati janë Shqipëria, Bosnja dhe Hercegovina, Kosova, Mali i Zi, Maqedonia e Veriut dhe Serbia, po ashtu disa shtete anëtare të BE-së, Mbretëria e Bashkuar si nikoqire dhe institucionet e BE-së, theksohet në komunikatën e Qeverisë gjermane”, theksohet në komunikaten e Kabinet të Kancelarit Fridrich Merz.

Ndryshe, Gjermania e nisi Procesin e Berlinit në vitin 2014, me qëllim të promovimit të bashkëpunimit rajonal me dhe ndërmjet gjashtë vendeve të Ballkanit Perëndimor.

Procesi i Berlinit është një platformë ndërkombëtare që bashkon qeveritë e të gjashtë vendeve të Ballkanit Perëndimor, së bashku me partnerë të tjerë evropianë.