GJKKO e Apelit lë në arrest shtëpie Berishën, Avokati: S’është humbur lufta, do ta fitojmë!
Gjykata e Posaçme e Apelit për Korrupsionin dhe Krimin e Organizuar, ka rrëzuar sërish kërkesën e Ish-Kryeministrit Sali Berisha dhe dhëndrit të tij, Jamarbër Malltezit, duke i lënë në “arrest shtëpie”.
Avokati i Berishës, Genc Gjokutaj e quajti këtë vendim politik dhe pretendoi se arsyeja është se SPAK dhe GJKKO do që Sali Berishës ti digjet mandati i deputetit.
Risi e hetimit të SPAK që lufton korrupsionin e Sali Berishës, sqaroi avokati i Ish-Kryeministrit, ishte kërkesa drejtuar Zyrës së Mbrojtjes Kundër Zjarrit për të parë nëse ndërtimet kishin ose jo mbrojtje nga zjarri!
“Për një proces të rregullt ligjor është alarmante që diligjenca dymujore ishte kopje e dy muajve të para, i njëjti tekst me të njëjtat fakte dhe kishte një tekst që SPAK i kishte dërguar Zyrës së Mbrojtjes Kundër Zjarrit në lidhje me ndërtimet nëse kishin ose jo mbrojtje nga zjarri dhe kjo është një gjë, e cila do t’i japë një shtysë shumë të madhe hetimit,” tha avokati i Sali Berishës i bindur se lufta nuk është humbur dhe atë do ta fitojnë:
“Ky është një skandal më vete dhe ndërkohë që lideri i opozitës vazhdon arrestin shtëpiak pa u zhvilluar hetimet dhe pa u gjetur prova të reja. Ne nuk kemi humbur në shkallët e gjykatave, por ne kemi dokumentuar shkeljet skandaloze të këtyre gjykatave në këtë proces.
Nuk është humbur lufta. Atë do ta fitojmë.”
Vendimi:
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtarja Iliriana Olldashi, sot më 03.05.2024, shpalli vendimin mbi çështjen penale nr. 96 akti, datë 25.04.2024 regjistrimi, regjistruar mbi ankimin e personave nën hetim/ankues S.B. dhe J.M., me objekt:
“Ankim ndaj vendimit nr. 200 akti, datë 08.04.2024 të Gjykatës së Posaçme të Shkallës së Parë për Korrupsionin dhe Krimin e Organizuar (disponuar mbi kërkesën me objekt zëvendësimin e masës së sigurimit personal)”, dhe vendosi:
Miratimin e vendimit nr. 200 akti, datë 08.04.2024 të Gjykatës së Posaçme të Shkallës së Parë për Korrupsionin dhe Krimin e Organizuar
