GJKKO la të pandryshuar masat e sigurisë për Malltezin dhe Bektashin, për nesër thirrë Berishën

Gjykata e Posaçme e Shkallës së Parë kundër Korrupsionit dhe Krimit të Organizuar, GJKKO, la të pandryshuara masat e sigurisë për Jamarbër Malltezin dhe Fatmir Bektashin, në lidhje me privatizimin e ish-kompleksit Partizani në kryeqytet, duke e lënë në burg Malltezin dhe detyrim paraqitje për Bektashin, ndërsa për nesër në orën 14:00 tha se ka thirrë për ta marrë në pyetje Ish-Kryeministrin Sali Berisha.

SPAK e akuzon për korrupsion dhe pastrim parash, mirëpo vetë Jamarbër Malltezi ka mohuar akuzat dhe ka pretenduar se nuk ka kryer asnjë shkelje ligjore. Nga ana tjetër, sipas avokatëve mbrojtës në veprimet e Malltezit nuk ka vepër penale.

Pasi dëgjoi palët, GJKKO la në fuqi masën e sigurisë “arrest me burg” për Jamarbër Malltezin dhe “detyrim paraqitje” për ndërtuesin Fatmir Bektashi.

Nesër pritet të dalë para trupës gjykuese Ish-Kryeministri Sali Berisha i cili aktualisht është nën masën detyrim paraqitje dhe i ndalohet largimi nga vendi ndërsa akuzohet nga SPAK se me veprime konkrete ka ndikuar në miratimin e ligjeve apo akteve nënligjore të cilat u përshtatën me kërkesat e 5 pronarëve, mes të cilëve përfitues ishte dhe dhëndri i tij, Jamarbër Malltezi.

Gjykata e Posaçme e Shkallës së Parë kundër Korrupsionit dhe Krimit të Organizuar thotë se ish-kryeministrin Sali Berisha e ka thirrur për nesër në orën 14:00 që ta marrë në pyetje, dhe e cilëson si të njoftuar për vendimin dhe më pas është e detyruar të zbatojë procedurën.

I pyetur nëse do të marrë pjesë në këtë seancë, Ish-Kryeministri Sali Berisha tha se nuk ka marrë asnjë njoftim.