Gjokoviç humb gjyqin, pritet të dëbohet nga Australia

Shpresat e Novak Gjokoviçit për të luajtur në turneun e tenisit “Australian Open” u shuan sot pasi një gjykatë hodhi poshtë ankesën e yllit të tenisit kundër një urdhri deportimi.

Tre gjyqtarë të Gjykatës Federale mbështetën njëzëri vendimin e marrë të premten nga Ministri i Emigracionit të Australisë, Alex Hawke për anulimin e vizës së 34-vjeçarit serb për arsye të interesit publik.

Vendimi do të thotë që Gjokoviç, i cili nuk është vaksinuar kundër COVID-19, do të qëndrojë në paraburgim në Melburn derisa të deportohet.

Deportimi zakonisht ndodh sa më shpejt që të jetë e mundur pas një urdhri, përveç nëse parandalohet nga veprimi gjyqësor.

Qeveria nuk ka thënë se kur do të largohet Gjokoviç. Një urdhër dëbimi zakonisht përfshin gjithashtu një ndalim tre-vjeçar të kthimit në Australi.

Novak Gjokoviç tha sot se ishte jashtëzakonisht i zhgënjyer nga vendimi i gjykatës, por ai do të pajtohej dhe do të largohej nga vendi.

“Unë e respektoj vendimin e gjykatës dhe do të bashkëpunoj me autoritetet përkatëse në lidhje me largimin tim nga vendi”, tha 34-vjeçari.

Gjyqtari kryesor, James Allsop, tha se gjykimi kishte të bënte me atë nëse vendimi i ministrit ishte “iracional ose ligjërisht i paarsyeshëm”.

“Nuk është pjesë e funksionit të gjykatës që të vendosë mbi meritat ose mençurinë e vendimit,” tha Allsop.

Kolegji i gjyqtarëve nuk dha shpjegime me shkrim për vendimin e tyre të dielën. Ato do të publikohen në ditët në vijim.

“Ky nuk është një apel kundër vendimit të qeverisë ekzekutive. Është një kërkesë në gjykatë si një krah i veçantë i qeverisë për të shqyrtuar ligjshmërinë e vendimit (të ministrit)”, tha ai.

Gjokoviç u urdhërua gjithashtu të paguante shpenzimet gjyqësore të qeverisë.

Procesi gjyqësor që Gjokoviq kishte shpresuar se do të mbante gjallë aspiratat e tij për një titull të 21-të Grand Slam ishte jashtëzakonisht i shpejtë për standardet australiane.

Brenda tre orëve nga njoftimi i Hawke të premten pasdite se viza e Gjokoviqit ishte anuluar, avokatët e tij ishin para një gjyqtari të Gjykatës Federale të Qarkut për të nisur kundërshtimin e tyre ndaj vendimit.

Çështja u dërgua në Gjykatën Federale të shtunën dhe parashtresat u dorëzuan nga të dyja palët po atë ditë.

Të tre gjyqtarët e dëgjuan çështjen për pesë orë të dielën dhe shpallën vendimin e tyre dy orë më vonë.

Në mes të përfundimit të seancës dhe vendimit, Tennis Australia, organizatori i turneut, kishte njoftuar se Djokovic ishte planifikuar të luante ndeshjen e fundit të hënën në Rod Laver Arena.

Ai duhej të luante me Miomir Kecmanoviq, një bashkëkombëtar serb i renditur i 78-ti në botë.

Tenis Australia nuk kishte asnjë koment të menjëhershëm për humbjen ligjore të tenistit.

Ministri e anuloi vizën me arsyetimin se prania e Gjokoviçit në Australi mund të jetë një rrezik për shëndetin dhe “rendin e mirë” të publikut australian dhe “mund të jetë kundërproduktive ndaj përpjekjeve për vaksinimin nga të tjerët në Australi”.

Viza e Gjokoviçit, raporton RFE, u anulua fillimisht më 6 janar në Aeroportin e Melburnit disa orë pasi ai mbërriti për të garuar në Grand Slam-in e parë të vitit 2022. Një zyrtar kufitar anuloi vizën e tij pasi vendosi që Gjokoviç nuk kualifikohej për një përjashtim mjekësor nga rregullat e Australisë për vizitorët e pavaksinuar.