Gjuriç me Listën Srpska ndërsa Vuçiç në linjë telefonike

Drejtori i Zyrës për Kosovën pranë Qeverisë e Serbisë, Marko Gjuriç dhe Sekretari i Përgjithshëm i Presidentit të Serbisë, Nikola Selakoviç janë takuar në Mitrovicën e Veriut me anëtarë të Listës Srpska, përfaqësuesit e serbëve të Kosovës. Serbëve të Kosovës u është premtuar se “çfarë do që të ndodhë në të ardhmen“ ata do t’i kenë “të gjitha”, raporton RFE.

Ndërkohë Presidenti i Serbisë, Aleksandar Vuçiç iu drejtua njerëzve që ishin mbledhur, në fund të takimit, me anë të telefonit të cilin Gjuriç e lëshoi që ta dëgjonin të gjithë.

Me këtë rast, Vuçiç premtoi projekte të mëdha infrastrukturore për serbët në Kosovë, duke theksuar se zgjidhja me Kosovën është larg dhe se ai do të vazhdojë të luftojë. Vuçiç kërkoi mbështetje nga serbët e Kosovës. Ai gjithashtu njoftoi për ardhjen e tij në Kosovë në muajin shtator dhe se me këtë rast do të tregojë se çfarë të reja ka në mes të dialogut me Kosovën.

“Këtë vit dhe vitin e ardhshëm ne do të bëjmë projekte të mëdha të infrastrukturës në Kosovë, në jug dhe në veri të Ibrit, do të rregullojmë ujësjellësin, kanalizimet, dhe do të investojmë para më shumë se kurrë, sepse duam të tregojmë se jemi me njerëzit tanë, dhe se do të jemi me njerëzit tanë gjithmonë”, tha Vuçiç me anë të telefonit duke shtuar se Serbia nuk do të zvogëlojë praninë e saj.

“Kopshti në Shtërpcë, dhe jo vetëm ai kopsht, tani duhet të tregoni se për çka ka nevojë më shumë Shtërpca, për sistemin e ujësjellësit në Zubin Potok dhe të gjitha të tjerat që duhet të punojmë për Leposaviçin, Zveçanin dhe Mitrovicë, Ranillugun, Parteshin e Graçanicën”, tha Vuçiç.

Ai gjithashtu tha se asnjë vendim nuk do të merret nga Beogradi, pa serbët e Kosovës.

Në takimin që ishte i hapur për media, zyrtarët e Beogradit u thanë serbëve të Kosovës se ata mund të kenë besim në Vuçiçin ndërsa politikanët serbë të Kosovës, thanë se populli serb në Kosovë i beson Vuçiçit.

Gjuriç tha në tubim se Vuçiç i cili “merret ditë e natë me Kosovën” ka marrë vendim që në veri të Kosovës dhe në çdo mjedis ku ka serb në jug të Ibrit, deri në fund të këtij viti do të përfundojnë të gjitha projektet e filluara.

“Ajo që dua nga Mitrovica është t’i tregoj çdo serbi në Kosovë, se çfarë do që të ndodhë në të ardhmen, do të keni më shumë, nuk do të ju gënjejë askush, nuk do të keni më pak para, do të keni më shumë mbështetje nga Serbia”, tha Gjuriç.

Në takim, gjithashtu u tha se serbët e Kosovës kanë nevojë për paqe dhe prosperitet dhe një të ardhme të sigurt për gjeneratat e ardhshme, por gjithashtu edhe unitet në mes të tyre.

Kryetari i Listës Srpska, Goran Rakiç tha se populli serb dhe Lista Srpska kanë besim të plotë në presidentin serb, Aleksandar Vuçiç.

“Për këtë arsye po ju bëjmë thirrje që të vazhdoni me luftën për një të ardhme më të mirë dhe më të sigurt për popullin serb“, bëri të ditur Rakiç.

Ndërsa Kryetari i Graçanicës, Srgjan Popoviç tha se sot më shumë se kurrë duhet që të ketë unitet në mes të serbëve.

“Këto ditë, ne nuk duhet të bimë pre e provokimeve dhe të mos biem pre e mekanizmave të ndryshëm e personaliteteve të ndryshme. Sot duhet të jemi të fortë”, tha Popoviç.

Sekretari i Përgjithshëm i Serbisë, Nikola Selakoviç, tha se sot si kurrë më parë serbët e Kosovës kanë një udhëheqës si Vuçiç të cilit duhet t’i besojnë